418وتار

کۆنفرانس و هەڵبژاردنە ناوخۆییەکانی بزوتنەوەی گۆڕان، بەرەو کوێ؟

6/14/2021 6:16:00 PM

بەختیار شارەزووری

بزوتنەوەی گۆڕان تەنها حیزبێک نیە لە چوارچێوەی ڕێکخستنێک و چەند ئۆرگانێکدا بێت ، بەڵکۆ بزوتنەوەی گۆڕان وەک حیزب ئەو سکەی شەمەندەفەرەیە کە شەمەندەفەرەکە پڕۆژەیەکی گشتگیری نیشتمانیە و لەسەر سکەی گۆران دەڕوا ، بە مانایەکی تر دروستبونی بزوتنەوەی گۆڕان وەک ژورێکی نەشتەرگەری یان مەتبەخێکی سیاسیە تا هەرێم لە قۆناغێکی چەقبەستوی غەرق بوی ناو کۆمەڵێک قەیران بباتە قۆناغیکی تر و نەشتەرگەری بۆ قەوارەی هەرێم بکات ، ئەمەش پێداویستی قۆناغەکەیە و گۆڕان وەک پڕۆژەیەکی چاکسازی نیشتمانی دەبێتە تاکە ڕیگای دەوڵەتداری و قۆناغەکانی گواستنەوە ، ئەگەر چی ئەم پرۆسەی گشتگیری نیشتمانیە تا ئێستاش دژایەتی زۆری دەکرێ بە شێوەیەک هەرێم دابەشبوە بەسەر دو سەنگەردا ، هەمو حیزبەکان سەنگەرێک و گۆڕان سەنگەرێک کە داوا دەکات پرۆسەی چاکسازی و ڕیفۆرمی گشتی بە پێ ی پاکێجەکانی کاری لەسەر بکرێت ، لێرەوە دوای مەرگی نەوشیروان مستەفا هێرشێکی بەربڵاوی گەورە کراوەتە سەر گۆڕان بە ماکینەیەکی گەورەی ڕاگەیاندنەوە تا ئەو ئاستەی هەمو گوناهەکان بخەنە ئەستۆی گۆڕان بۆ مانەوەی هەرێم لە دۆخێکی گەندەڵی گشتیدا ، گۆڕان تاکە هێزە کە مانەوەی قەوارەی هەرێمی لە ئەستۆدایە بە نەفەسێکی درێژ و بەهێواشی و پلە بەندی کار لەسەر چاکسازی و پاکێجەکانی دەکات لە ناو دەستەڵاتەوە.

گۆڕان وەک یەکەم حیزبی مەدەنی بێ چەک و خاوەن پڕۆژەی نیشتمانی و دەرکەوتنی سەرەتای قۆناغێکی نوێ لە خەباتی مەدەنی و بێ خوێن و بێ چەک خاوەن دسپلین وهەیکەلێکی ڕێکخراوەیی خۆیەتی کە لە کڵێشە و دابەشبونی دەستەڵاتەکاندا تەواو جیاوازە لە حیزبەکانی تر و دەستەڵاتی سێگۆشەیی و مەکتەب سیاسی لە لوتکەی سێگۆشەکەدا نیە ، بەڵکو خاوەنی پێکهاتەیەکە لە ڕێکخستن و دابەشبونی دەستەڵاتەکان کە جیاوازتر لە ئسلوبە تەقلیدییەی کە پێشتر باو بوە ، گۆڕان تەشکیلاتی بە شێوەی لاکێشەیی و بە شێوەی پەرلەمانی بڕیارەکان دەدرێن واتا جڤاتی نیشتمانی پەرلەمانەکەیەتی و جڤاتی گشتی ڕاوێژکاری و ژورەکان پلانی زانستی و سەرپەرشتی کردنی دۆسیەکانی تایبەت بە خۆیان ، خانەی ڕاپەڕاندن کاری تەنها جێبەجێکردنی بڕیارەکانی پەرلەمانە واتا جڤاتی نیشتمانی ، جڤاتی نیشتمانیش نوێنەرایەتی بازنە و ڕایەڵە و پشتوان دەکەن بە پێ ی دەنگدان.

لە ئێستادا دوای مەرگی کاک نەوشیروان بزوتنەوەی گۆڕان کار لەسەر خۆ نوێکردنەوە و کۆنفرانس و هەڵبژاردنە ناوخۆییەکان دەکاتەوە ، ئەگەر چی دەبو لە کاتی یاسایی خۆیدا کۆنفرانس و هەڵبژاردنە ناوخۆییەکان بکرایە ، بەڵام بە هۆی کۆمەڵێک هەل ومەرجی تایبەتەوە نەتوانرا لە کاتی خۆیدا هەڵبژاردنە ناوخۆییەکان بکرێت بەدەر لە خانەی ڕاپەڕاندن کە شەرعیەتی ماوە هیچ یەکێک لە ئۆرگانەکان شەرعیەتی دەستوریان نەما بو ، لە ئێستادا گۆڕان بە قۆناغێکی سەختدا تێدەپڕێ کە دەکرێ کۆنفرانسە ناوخۆییەکان بتوانێت ئەم قۆناغە سەختانە تێپەڕێنی و شەرعیەتی دەستوری بدات بە هەمو ئۆرگانەکانی ، لێرەوە دەتوانین بڵێین کۆنفرانسە ناوخۆییەکانی گۆڕان دەتوانێت :

1.    چێکینی کادرەکانی خۆی بکات و ئەو کات لە ڕێی ژوری سەرچاوە مرۆییەکانەوە دەبێت بە خاوەن داتایەکی هەقیقی و دەتوانێت لە ڕێی پەروەردەکردنەوە کار لەسەر تواناکانی کادرەکانی ناو رێکخستنی بکات .

2.    دەبێتە هۆی کار کردن لەسەر چۆنایەتی کادر و دەتوانێت ببێتە بناغەیەک بۆ کاری ڕێکخستن و پتەوکردنی توانا فکریەکانی .

3.    پرۆسەیەکی دیموکراسی و هەڵبژاردن بە پێوەری دەنگدەرەکانی گۆڕان دەڕوا و ئەوەی ئامادەی هەیە لەگەڵ ئەم بزوتنەوەیدا بمێنێتەوە و کار بکات دەتوانیت بە پێ ی تۆماری ناوەکان نوێنەری خۆی بۆ پۆستەکانی ئۆرگانەکان هەڵبژێرێ یان خۆی هەڵبژێرێ .

4.    هەڵبژاردنەکانی ناوخۆ دەبێتە ئەو فلتەرەی کە کادر و ئەندامی چالاک و ناچالاک لە یەکتر جیا بکاتەوە .

5.    کۆنفرانسی نیشتمانی دەبێتە پێداچونەوە بە هەیکەلی ڕێکخستن و دەستەڵاتەکانی ئەنجومەنەکان و دیاری کردنی ئاراستەی گشتی سیاستی بزوتنەوەی گۆران .

6.    هاتنە پێشەوەی خوێنی تازە و هێزی نوێ .

کۆنفرانس و هەڵبژاردنە ناوخۆییەکان وەک وەڵام دانەوەیەک بۆ ئەوەی دەگوترا گۆڕان ناتوانێ خۆی نوێ بکاتەوە و هەڵبژاردنە ناوخۆییەکانی ئەنجام بدات ، لە ئێستەوە ئەم پرۆسەیە دەبێتە هێزێک بۆ گۆڕان تا کار لەسەر پڕۆژە نیشتمانیەکانی بکات .