وتار

مەلا بەختیار بۆ وادەكات؟!

9/14/2020 4:42:00 PM 440 جار خوێندراوەتەوە
هەڵۆ ئەبوبەکر

جێگای داخە كۆمەڵگای ئێمە هاوشێوەی كۆمەڵگا دواكەوتوەكانی تر زۆربەی كات خەڵكی بە شتگەلێكەوە سەرقاڵن یان سەرقاڵ دەكرێن كە بەڕاستی جێگای بایەخ نین، لەكاتێكدا شتگەلێكی زۆر گرنگتر هەن كە پێویستە گرنگیان پێبدرێت..

ئەوەی بۆ من گرنگە ئەوەیە بەداخەوە ڕۆژانە لانی كەم لە هەرێمی كوردستان ٢٠ كەس بە كۆرۆنا گیان لەدەست دەدەن بەڵام ئەم بابەتە لای خەڵكی زۆر ئاسایی دەبینیرێت و تەنانەت كەسانێك هێشتا پێیانوایە كۆرۆنا ڕاست نیە، كێشەكە ئەوەیە تاوەكو ئەو كەسانە كەسێكی ئازیزیان لەدەست نەدەن بڕوا ناكەن و هیچ خۆپارێزییەكیش ناكەن بۆ پاراستنی ژیانی خۆیان و ئەوانی تر، بەپێچەوانەوە سەیری هەرچی وڵاتی دونیا هەیە بكە بەتایبەت وڵاتە پێشكەوتوەكان باس باسی كۆرۆنا و ڕێكارەكان و كەمكردنەوەی ژمارەی قوربانیەكانە، تەنانەت وای لێهاتوە، گرەوی سیاسیەكان و سەركەوتنیان لەسەر ئەوەیە تاچەند لە ڕووبەرووبونەوەی كۆرۆنا سەركەوتو بون، ئێستا بەڕونی لە میدیای ئەمریكادا ئەوە دەبینیت كە چ بۆ ترەمپ و كۆمارییەكان و چ بۆ بایدن و دیموكراتەكان پرسی كۆرۆنا ئەو پرسەیە كە تەحەدای یەكتری پێدەكەن.

بۆ من جێكای سەرنج و داخە كە كاتێك پیاوێكی وەك مەلا بەختیار كە قسە دەكات لەسەر سەركردەیەكی وەك نەوشیروان مستەفا هەمو سۆشیال میدیا داگیر دەكات، لەڕاستیدا مەلا بەختیار و بازاڕە سیاسیەكەی تەواو بوە، بەڵام ئەو ئێستا زۆر باش دەزانێت تەنها شت بۆ ئەوەی جارێكی تر ناوی بهێنرێت ئەوەیە باسی كەسێك بكات كە شوێنی لەدڵی خەڵكی كوردستاندایە، بۆ مەلا بەختیار گرنگ نیە چۆن باس دەكرێت گرنگ ئەوەیە باس بكرێت، تەنها یەك پرسیار ئەگەر مەلا بەختیار باسی نەوشیروان مستەفا نەكات باسی چی بكات خەڵك لەسەری دێتە دەنگ؟

بەهەرحاڵ منیش نامەوێت بچمە هەمان بەند و بالۆرەوە، ئەوەی گرنگە و دەمەوێت بیڵێم لەئێستادا هیچ شتێك لەوە گرنگتر نیە هەمو توانامان بخەینەكار بۆ ڕووبەرووبونەوەی كۆرۆنا كە ڕۆژانە ئازیزانمان لەگەڵ خۆی دەبات و زۆریشمان ئازار دەدات.

پێویستە ئێستا هەمو زمانی ڕەخنەمان ئاراستەی ئەم حكومەتە بكەین كە هیچ ستراتیژێكی بۆ ڕووبەرووبونەوەی ڤایرۆسەكە نەماوە.

تەنها بیربكەرەوە ئەگەر بەمشێوەیە ڕۆژانە كۆرۆنا ئازیزانمان بەرێت لەماوەی یەك ساڵی تردا لانی كەم ١٠ هەزار كەس لە كوردستان بە ڤایرۆسەكە دەمرن، كەواتە ئەوە پرسیاری منە بۆ تۆ ژیانی ١٠ هەزار هاونیشتیمانیت گرنگترە تاوەكو ڕوبەری ئەكاونت یان پەیجەكەتی بۆ تەرخان بكەیت لە فەیسبوك یان هەر جۆرێكی تری سۆشیال میدیا، یان نوسین و وەڵامدانەوەی مەلا بەختیار كە لەڕاستیدا نەوشیروان مستەفا و مێژوەكەی هێندە درەوشاوەیە پێویستی بەوە نیە من و تۆ بەرگری لێ بكەین، بەپێچەوانەوە ئاوەكە دەڕژێتە ئاشی مەلا بەختیارەوە.

سۆشیال میدیا

ڕۆژنامەی زەمەن

Advertisement