هەواڵ

شەهێن جەمال کارە نوێیەکەى بۆ زەمەن ئاشکرا دەکات

10:13 - 01/09/2019 240 جار خوێندراوەتەوە

زەمەن: مەزهەر كەریم

شەهێن جەمال ئاماژە بەوە دەكات ئەو یەكەم شاجوانی سلێمانی بووە، یەكەم ئافرەتیش بووە بەشداری خولی سەرتاشینی كردووە دەڵێت: “ئەوكەسانەی ئێستا لە راگەیاندنەكان وەك یەكەم شاجوان‌و یەكەم سەرتاش دەردەكەون بیرۆكەكەی منیان بردووە بۆخۆیان و ڕاست ناكەن”. 

ئایا بۆ هیچ كارێكی نوێ پێیان وتووە یان نا؟ ئەو بۆ “زەمەن” وتی: “لە ئایندەیەكی نزیكدا بەشداری درامای ئەرخەوان دەكەم ڕۆڵی سەرەکیم پێدەدرێت، كە دەرهێنانی كاروان ئاواتە، ڕۆژانەش بۆچەند كاری دیكەی هونەریی پێمدەڵێن، بەڵام دەرهێنەری كارەكەو دەورەكەم بەدڵ نەبێت ئەو كارە ڕەتدەكەمەوە”.


ئەو وتیشی: “زۆر باسی ئەوە دەكرێت بۆچی بەشدار نەبووم لە درامای سەمای تەرزەدا، بەڵام من دەمەوێت ئەوە ئاشكرا بكەم بەهۆی بەشداری‌و بەركەوتنم لەگەڵ ئەكتەرێكدا، كە من نامەوێت لەئێستاو داهاتووشدا بیبینم بەشداریم نەكرد لەو درامایەداو ڕەتمكردەوە، ئەمە سەرەڕای ئەوەی كوڕەكەم نەخۆش بوو”.


ئەوەشی وت: “من كارم لەگەڵ زۆربەی دەرهێنەرەكان كردووە ئەوەی بۆمن جێگەی باسكردنەو كارەكانیان زیاتر منیان ناساندووە بریتی بوون لە جەلیل زەنگەنەو میران شیری‌و مەریوان ئیبراهیم‌و كامەران جەمال”.


باسی ئەو كارە نوێیەش دەكات بەدەر لەكاری هونەریی، ئەو دەڵێت: “لەپاڵ كارە هونەرییەكانمدا لەگەڵ هاوڕێیەكی هاوسەرەكەم كافتریایەكمان لە شەقامی سەهۆڵەکەی شاری سلێمانی كردووەتەوە بەناوی كافتریای نەی تونای شەهێن، ڕۆژانە وەك سەرپەرشتیار چەند كاتژمێرێك لەو جێگەیە كاردەكەم، لە هەولێریش پێیان وتووم بەناوی خۆم كافتریایەك بكەمەوە بەڵام لەئێستادا ڕەتمكردووەتەوە”.
شەهێن جەمال ئەوەش دەڵێت: “هۆكاری دەرنەكەوتنم لە كاری هونەریی بۆ ئەوە دەگەڕێتەوە وەزارەتی ڕۆشنبیری پارەی نییە خزمەتی كاری هونەریی هونەرمەندانی پێبكات هەربەوهۆیەوە هیچ كارێكی هونەریش لەكاتی پێویستدا نییە”.


لەساڵی 2004دا دەستیكردووە بە كاری هونەریی، بەشداری چەندین دراماو كورتەفیلم‌و كاری سینەمایی كردووە لە بواری نواندن لەساڵی 2009 خەڵاتی باشترین ئەكتەری كچی پێبەخشراوە لە فێستیڤاڵی فیلم لەسلێمانی لەوڵاتی قەتەر وەك باشترین ئەكتەری كچ دیاری كراوە.

سۆشیال میدیا

ڕۆژنامەی زەمەن