لە شارباژێڕ بەردێکی بەنرخ و دەگمەن دۆزرایەوە
02:34 - 05/09/2026
زەمەن_هەواڵ
مامۆستایەکی بەشی شوێنەواری زانکۆی سلێمانی دەڵێ، بەردێکی دەگمەنیان لە شارباژێر دۆزیوەتەوە؛ ئاماژە بەوەش دەکات، مێژووی ئەو بەردە بۆ نزیکەی 200 هەزار ساڵ لەمەوپێش دەگەڕێتەوە.
ئەمڕۆ شەممە، ٥ی ئەیلەلی ٢٠٢٦، د. دڵشاد زاموا، مامۆستا لە زانکۆی سلێمانی رایگەیاند: بەردێکیان لە گوندی واژە لە سنووری شارباژێر دۆزیوەتەوە و لە بەردی کوارتز دروست کراوە، تەمەنی ٢٠٠ هەزار ساڵە و کۆنترین ئامرازی بەردینە کە مرۆڤ لە ناوچەی شارباژێڕ درووستی کردبێت و بۆ شت بڕین بەکاریهێنابێت."
د. دڵشاد زاموا دەڵێت، "شێوەی گرتن و بەکارهێنانی بەردەکە لەوە دەچێت، ئەو مرۆڤەی بەکاریهێنابێت بە دەستی چەپ کاریکردبێت؛ هاوکات بە راوێژ لەگەڵ پسپۆرانی باشوور و رۆژهەڵاتی کوردستان گەیشتووینەتە ئەو بڕوایەی مێژووەکەی بۆ چاخی بەردینی کۆن دەگەڕێتەوە."
سەبارەت بە شوێنی هەڵگرتن و پاراستنی بەردەکە، د. دڵشاد زاموا گوتی، "لەبەرئەوەی شارباژێڕ تاوەکو ئێستا مۆزەخانەی نییە، بەڕێوەبەرایەتی مۆزەخانەی سلێمانی بە شێوەیەکی کاتیی بەردەکە وەردەگرن و دەیپارێزن، تا ئەوکاتەی (مۆزەخانەی شوێنەوار و شارستانیی زانکۆی سلێمانی) دەکرێتەوە."