کەلتور

فۆرمی گەڕان فۆرمێکی نوێ بۆ شیعر نووسین

08:11 - 11/05/2021 215 جار خوێندراوەتەوە

ناڵە حەسەن -تایبەت بە کولتووری زەمەن

گەڕان ٢ ...
( وەرزەکان ، هیوا ، تەنیایی ، عاشق ، جەنگ ، کتێب ، گەڕان ، یاخیبوون ،
موسافیر ، مردن ، دابڕان )

١/ ( ....... )
لە ژێر ڕەشماڵی ئاگر ڕادەکشێت و
لە نێو مەمکۆڵەکانی بەفر سەما دەکا
خەون دەکات بە نیشتیمانی خۆی
ئەفسانە ئیرۆسییەکان دەخوێنێتەوە
بە زمانی گوڵ قسە دەکات و
مانگ و باڵندە تەنیاکانیش دەلاوێنێتەوە

٢ / ( ....... )
لە نێو خۆیدا
مەودای نێوان
ژیان و لە دایکبوونەوە
نزیکتر دەکاتەوە
مەودای نێوان ژیان و مردنیش دوور
ڕووناکی دەکات بە نیشتیمانی خۆی
خۆرەتاو بە نێو کۆڵانە تاریکەکاندا دەگێڕێ

٣/ ( ....... )
بەسەر شەپۆلەکان بازدەدات و
ئاوڕ لە دەریاکان ناداتەوە
ڕەشەبا دەکات بە نیشتیمانی خۆی
بۆ ئەستێرە بەرزەکان ناچەمێتەوە
بە زمانی زریان قسە دەکات و
فرمێسکەکانی نائومێدی دەسڕێتەوە

٤ / ( ....... )
عەشق لەگەڵ باراندا دەکەن
پەیکەرەکانی کات نوێ دەکەنەوە
ڕەنگەکان دەکەن بە نیشتیمانی خۆیان
مانایەک بە خاک و عەشق دەبەخشن

٥ / ( ....... )
ڕێگە باریکەکانی تاریکی دەگرێتە بەر
لە نێو کۆڵانەکانی با دەگیرسێتەوە
کەناری دەریاکان دەکات بە نیشتیمانی خۆی
ئایەتەکانی ئومێدیش لە بۆشاییدا دەنووسێتەوە

٦/ ( ........ )
هەموو دەرگا و پەنجەرەکان
بە ڕووی ژیان دا دەخات
مەرگ دەکات بە نیشتیمانی خۆی
ژیان دەکات بە زیندانێکی تاریک

٧ ( ....... )
گوڵەباغێک
لە نێو قووڵایی تەنیاییدا
ئاگر لە سێبەری خۆی بەردەدا
دۆزەخ دەکا بە نیشیمانی خۆی
بە پارچە خەلووزێکی ڕەش
لە سەر دیوارە سپییەکانی خەون
بیرەوەرییەکانی خۆی دەنووسێتەوە

تێبینی :

١- خوێنەری خۆشەویست ناونیشانی ئەم وردە شیعرانە لەو وشانەی سەرەوە هەڵبژێرن، هەندێکیان زێتر لە ناوێک لەخۆدەگرن. خۆتان ئازاد و سەرپشکبن لە دانانی ناونیشانەکان ...!

_ مانیفێستۆکەیەک یان ئامانجمان لە فۆرمی ( گەڕان )
سەرەتا / فۆرمی ( گەڕان ) فۆرمێکی نوێیە بۆ شیعر نووسین ، ئامانجمان لە داهێنانی ئەم فۆرمە ئەوەیە ،
١/ گەڕان بە دوای ناونیشان دا ، واتە گەڕان بەدوای( شوناس ) دا ، چ لە ئاستی تاک یان ئاستی کۆ ، واتە لە ئاستی ( کۆمەڵگە ) .
٢/ بەشداریکردنی کارای خوێنەر لە بەرهەمهێنان یان تەواوکردنی دەق ، بە دانانی ( ناونیشان ) واتە ، ئاوێزانبوونی خوێنەر لە ڕووبەرە شاراوەکان و تاریکەکانی دەق .
٣/ بەرینترکردن و فراوانکردنی دەسەڵاتی خوێنەر .
٤/ دەرکەوتنی خوێنەر وەک بوونێکی ( ئازاد ) ، هاوکات لەبەردەم هەڵبژاردنی چەند ئۆپشنێک .
٥/ ئیشکردن لەسەر گومان و ڕەتکردنەوەی بوونە ڕەها و جێگیرەکان ، واتە هەڵوەشاندنەوە و دوبارە بونیادنانەوەی دەستەواژەکان و چەمکە میتافیزیکی و جێگیر و چەسپاوەکان .

تێبینی ٢:

ئەم فۆرمە چەند دەقێکی شیعریمان پێی نووسیوە، ئەو نموونەیەی سەرەوە یەکێکە لەوان، هەموو دەقەکانی ئەم فۆرمە وەک بەشێکی سەربەخۆ، بەشێکن لە کتێبێکی شیعریم کە ئامادەیە بۆچاپ بەناوی (کۆڵانە زەردەکە) .