چیرۆکێکی ترسناک
09:20 - 27/01/2021
103 جار خوێندراوەتەوە
مارکۆ دینیفی
لەعەرەبیەوە: هێمن
مەحمود
خاتوو (سمیسۆن)
کە خەڵکی لەندەنە بڕیاریدا مێردەکەی خۆی بکوژێت ( ئەم چیرۆکانە هەمیشە لەنێوان ئینگلیزەکاندا
روودەدەن)، لەبەر هیچ نا، تەنها لەبەر ئەوەی دوای پەنجا ساڵ لەژن و مێردایەتی تاقەتی
نەمابوو.
بەمێردەکەی وت:
- سادیۆس...دەتکوژم!
مێردەکەی بەپێکەنینێکی
ماندوویەتیەوە پێی وت:
- ئۆفیمیا، تۆ گاڵتە
دەکەیت؟.
- من کەی گاڵتەم
کردووە؟.
- هەرگیز.. ئەوە ڕاستە.
- ئەی بۆچی لەم
ساتەداو لەبابەتێکی مەترسیداری وەک ئەمە گاڵتەبکەم؟
مێردەکە پێکەنینەکەی
درێژەپێداو وتی :
- يئەی چۆن دەمکوژیت..؟
- تا ئێستا
نازانم. لەوانەیە رۆژانە کەم کەم ژەهر بکەمە خواردنەکەتەوە، یاخود دەستکاری ئۆتۆمبیلەکەت
بکەم و پارچەیەکی لێبکەمەوە تا وەرگەڕێیت، یاخود پاڵێکت پێوەبنێم و لەقاڵدرمەکانەو
بتخەمە خوارەوە، یان لەوانەشە کاتێک خەوتویت فرسەتت لێ بێنم و بەشەمعدانە زیوینیەکە
بکێشم بەسەرتاو بتکوژم، یان کارەبا بخەمە سەر حەوزی حەمامەکەوە. بابزانین چۆنەبێت..؟
بەڕێز سمیسۆن تێگەیشت
ژنەکەی گاڵتەناکات.
خواردن و خەوی لەدەستدا،
دواتر توشی نەخۆشی دڵ و مێشک بوو.
دوای شەش مانگ گیانی
لەدەستدا.
ئۆفیمیا سمیسۆن
کە ژنێکی ئیمانداربوو، سوپاسی خودای کرد کەوا نەیکردووە بە بکوژو لەئەنجامدانی ئەو
کوشتنە رزگاری کردووە.