دیمانە

سەرۆکی فراکسیۆنی تورکمانی: ئاساییە بە 138 دەنگ بووم بە پەرلەمانتار

05:21 - 12/05/2020 337 جار خوێندراوەتەوە

سازدانی: رەهەند حەسەن

بەرەی توركمانی لە پەرلەمانی كوردستان خاوەنی یەک كورسین، هیمداد سەباح، سەرۆكی فراكسیۆنی بەرەی توركمانی لەم چاوپێكەوتنەی “زەمەن” دەڵێت: سیستمی كۆتا سیستمێكی باشە بۆ پێكهاتەكان، ئێمە وەكو توركمان لەگەڵ ئەوەداین ئەو رێژەیەی ئێمە كە پێنج كورسییە زیاتر بكرێت.

سەبارەت بەوەی خۆی بە 138 دەنگ بووەتە پەرلەمانتار، دەڵێت: زۆر ئاساییە، چونكە ئێمە پێكهاتەیەكین و تایبەتمەندیمان هەیەو یاساو سیستمی كۆتامان هەیە. ئەو یاسایەش هەموو حزب و لایەنەكان دەنگیان پێداوە.

* پلانتان بۆ داهاتوو چی دەبێت، لە پەرلەمانی کوردستان؟
- پلانم ئەوەیە بەگشتی ئەو پڕۆژەیەی كە لە خزمەتی هاوڵاتیاندایە بێشك لەگەڵی دەبم، ئەوە بێجگە لەوەی بۆ پرسی نەتەوەی توركمانیش چەند پڕۆژەیەكم هەیە. ئەوانیش بە یاساییكردنی مافەكانی توركمان و دانانی رۆژێكی نەتەوەیی بۆ توركمان و بەشداریكردنمان لە بەڕێوەبردنی وڵات و چەندین پرسی دیكەدا.
لەبوارەكانی رۆشنبیریی و پەروەردەییەوە بەتایبەتی هەبوونی هەیكەلیەو یەكەی ژمێریاری بۆ هەردوو دامەزراوەی بەڕێوەبەرایەتی گشتی رۆشنبیریی و هونەری توركمانی و پەروەردەی توركمانی.

* زۆرجار دەوترێت پەرلەمانی كوردستان وەك دامەزراوەی یاسادانان رۆڵی زۆری نییە بۆ چارەسەركردنی كێشەكانی خەڵك، بە رای ئێوە چۆن ئەم دامەزراوەیە كارا بكرێتەوە؟
- پێموایە بە پێچەوانەوە رۆڵی پەرلەمان لە قۆناغ و سەردەمەكان رەنگە جیاواز بووبێ، بەڵام ئێستا زۆر گەشبینم كە خولی ئێستا دەتوانێ لەڕێی پڕۆژەی تازەو هەمواری یاسا كۆنەكانەوە، خزمەتێكی باشی خەڵكی بكات و كێشەكانیان چارەسەر بكەین.

* بەرەی توركمانی بەوە تۆمەتبار دەکرێ کە زیاتر لە توركیاوە نزیكە، بۆ ئەم تۆمەتە چ وەڵامێکتان هەیە؟
- هەروەك پەیوەندی حزب و لایەنەكانی تری هەرێم، ئێمەش پەیوەندیمان لەگەڵ وڵاتانی ئیقلیمیی لەو ئاستەدایە کە ئەوانی تریش هەیانە. سەبارەت بە حزب و لایەنەكانی تری توركمانیش رێزم بۆ فرە حزبیی و ئایدۆلۆژیاو بیرو بۆچوونی جیاوازیان هەیە.

* مافی نەتەوەیی توركمان تا چەند لە ناو سیستمی حوكمڕانی هەرێمی كوردستاندا جێگیر كراوە؟
- ماف نادرێ و وەردەگیرێت، دیارە لەسەردەمی ئێستاماندا هیچ میللەتێك نییە بڵێی بە هەموو مافەكانی گەیشتبێ. ئێمەش كە لە پەرلەمانین بۆ ئەوەیە كە لەكوێ كەموكوڕی هەیە چارەسەری بكەین و هەوڵ بدەین مافەكانی تریش بەدەست بهێنین.

* پێشترو ئێستاش گفتوگۆیەكی زۆر هەیە لەسەر مەسەلەی حەق و ناحەقیی كورسی كۆتا بۆ پێكهاتە نەتەوەیی و ئاینیەكانی كوردستان، پێتانوایە لەكاتی هەڵبژاردندا چۆن سیستمێكی تایبەت بۆ كۆتای توركمان و مەسیحی دابنرێ؟
- سیستمی كۆتا سیستمێكی باشە بۆ پێكهاتەكان، ئێمە وەكو توركمان لەگەڵ ئەوەداین ئەو رێژەیەی ئێمە كە 5 كورسییە زیاد بكرێ. چونكە ئەوە لەگەڵ رێژەی توركمان لە هەرێمی كوردستاندا ناگونجێ، ئێمە دووەم نەتەوەین بۆیە دەبێ ئەو رێژەیە زیاد بكرێت دوای ئامارو بەدواداچوون.

* پێتوایە لە پەرلەمانی كوردستان فراكسیۆنە توركمانییەكان زیاتر كاریان بۆ خزمەتی پێكهاتەكەی خۆیان كردووە یاخود حزبە دەسەڵاتدارەكان؟
- بەڕای من خەڵك و هاوڵاتی و شەقام سەنگی مەحەكن و ئەوان دەزانن  كێ خزمەتی كردووە یان نا. من حزب و ئایدۆلۆژیای خۆم هەیەو هەر لایەنە و بیروبۆچوون و ئایدۆلۆژیای تایبەتی خۆی هەیە، بۆیە ماف بە خۆم نادەم باس لە سیاسەت و كاری حزبی خەڵكی تر بكەم.

* چۆن لە پەیوەندی نێوان هەرێمی كوردستان و توركیا دەڕوانی؟
- توركیا وڵاتێكی بەهێزە لە ڕۆژهەڵاتی ناوەڕاست و هاوسێی ئێمەیە، بۆیە دەبێت پەیوەندییەكانمان لەڕووی سیاسی، رۆشنبیریی و كۆمەڵایەتی و بازرگانییەوە زۆر بەهێزتربێ. هەرچەندە ئێستا پەیوەندییەكان زۆر باشن، چونكە توركیا دەروازەیەكی زۆر بەهێزیشە لە نێوان ئێمە و ئەوروپادا.

* ئێوە بە 138 دەنگ بوونە پەرلەمانتار، پێشتر پێشبینیت دەكرد بەو ژمارە دەنگە كەمە ببیتە پەرلەمانتار؟
- زۆر ئاساییە، چونكە ئێمە پێكهاتەیەكین و تایبەتمەندیمان هەیەو یاساو سیستەمی كۆتامان هەیەو ئەو یاسایەش هەموو حزب و لایەنەكان دەنگیان پێداوە، بۆیە زۆر ئاساییە.

دواتر 1 2 3 4 5 6 7 پێشتر 

سۆشیال میدیا

ڕۆژنامەی زەمەن

Advertisement