پەیڤەک ژڕاستیێ دڤێ بێ گؤتن
5/19/2021 10:32:00 AM
حاجی ڕێکانی
دەما هەلکەفتەک نشتیمانی بسەرمەدا دهێ،یان قسەوباسەک وەک وەفایەک دەربارەی رەوانشاد دهێتەپێش،ل وی چاخی دکەموناکەم کو بکارم چەن پەیڤەکێن ژهەژی ولایقی کەسایەتی وروح وخەبات وماندیبوونا ناڤبری بینمە زمان،چەندی بێژم وچەندی دارێژم وپەسنا وی بکەم،ئەز هەردبینم کێمە ودەرهەق دەرنەکەفتمە.ئەزباوەرم ئەز نەیێ ئێکەمم ژخویندکارێن خواندنگەها رەوانشاد بڤی دەردی دناڵینم،بەلکو هەرکەسێ بدڕوستایی هزروفەلسەفا نەوشیروان مەیزەکربە، ئەڤ ڕاستیە بو هاتیە سەلماندن.باشە ویێ مەیزە نەکربە،چەوا وکەنگی وێ بسەلمینە؟!،دژێرا دبێژم:وی چاخی ئەمێ بسەلمینن،دەما کو ئەم دیروکا بزاڤا سیاسی وئازادیخوازیا گەلێ کورد مەیزەدکن ولاپەرێن گەشێن خەباتا دەهان بەلکو سەدان ژسەرکردە وعەگیدێن کورد وکوردستانی تەماشەدکین ودخوینین،کو سەرباری ئەوسەرکردە ب قارەمانی دقوناغێن جودا جودادا هاتینە مەیدانا کوردایەتیێ وشۆڕەش پێخەمەت ئازادیا گەل ووڵات بەرپاکرینە،وسالوخەتێن جوانێن مرۆڤایەتێ لجەم وان هەبوونە وپەیرەوکرنە،زێدەباری کو خەباتکەر وئازادیخوازو وێرەک وشەرەنگیزبوونە وهەمی جهێ ڕێزێنە وئەم بەژنا خو بەرامبەر رەنج وخەباتا وان(یێن شەهید ویێن زێندی)دتەوینین.
لێ سەرباری وێ چەندێ هەمیێ دبینین دناڤبەرا وان هەمی سەرکردان،رەوانشاد نوشێروان مستەفا سەرپشک وسەرکێشێ هەمیانە،ئەڤەژک نەچونکە ئەز گۆڕانم لەوما ڤێ چەندێ دبێژم،بەلکو ئەڤە ڕاستیەکە وەک واقع وەک مێژوو ئەڤە یا سەلماندی،ویارونەیارێن کاک نەوشێروانی ب هەلکەفتێن جوداجودادا، هەم ب زارەکی وهەمژی ب نڤیسکی ئەڤ ڕاستیە یا دڕکاندی،ئەڤە هەمی ژلایەکی،وژلایەکێ دیڤە،چونکە ئەوسالوخەت ونیشانێن کەسایەتی، روحی، فیکری، سایکولوژی، ئەوێن لجەم رەوانشادی،هەی لجەم سەرکردێن دیتر نەبوونە!،دبیتن ب هەلکەفت ئێک ژسەرکردان ب سالوخەتەکی یان دوویان هەڤپشک ومیناکێ کاکێ رەوانشادی بت،لێ ب سالوخەتێن دیترڤە ژێک جودابن ونە گەهنە ئێک.
هەلبەتە،ئەڤ چەندە دێ ب زەقی بو مە دیاربیت دەما دوو نمونان دانین بەرچاڤ، وەکی:
١.دبارێ روشەنبیری وهزریدا،دبینین رەوانشاد چەندین پەرتۆک وبسەدان گۆتار وتێکست دبابەتێن جودا جودادا ودبارێ،سیاسی،هزری،دیروکی،جڤاکی،وێژەیی، و زمانەوانی، ئابوری، یاسایی، ئیداری، و کشتوکاڵی، نەوشێروان مستەفا ژڤەرێژا هزر وبوچوونێن خودا نڤیسینە.ئەڤەژک گەر ئەم مەیزەبکین،شورەشەک مەزنە وی بتەنێ خو ب خو ئەنجامدایە.
٢.دسەد ساڵیا بوریدا ژخەباتا چەکداری وسیاسی یا بزاڤا رزگاری خوازیا کوردی،ودقوناغا شەرێ برا کوژیێ دا،رەوانشاد ئێکەم کەس بووە،باوەری ئینای ب خەباتا مەدەنی وشارستانی،ولگۆر بنەمایێن دیموکراسیەتێ ومافێ مرۆڤ لساڵا ٢٠٠٩ێ بزاڤەک سیاسی چاکخواز دامەزراندی ودچوارچوڤێ وێ قەوارێ سیاسی کو بزاڤا گۆڕانە،ل هەرێما کوردستانێ وەک ئێکەم ئوپۆسیزیونا راستەقین پەیرەوکری،هەمی پیخەمەت حوکمرانەک ساخلەم وبەرقرارکرنا دادپەروەریا جڤاکی وئایندەیەکی گەش لباشورێ کوردستانێ بەرجستەببیت.
ئەڤەژک خالەک وەرچەرخانەبوو کو دیسان دێ ناڤلێکەم شورەش لێ برەنگێ سپی نەک سور رەحمەتی کاک نەوشێروان ددمێژوویا خەباتا باشورێ کوردستانێ تومارکری.
گەلەک نمونێن دیتر هەنە کو چەندی بێژم وڤەگێرم وپەسنا سالوخەت وخەبات وماندیبوونا رەحمەتی بکەم،ئەز تێهەڵناهێم ودەرهەق دەرناکەڤم،وەکو من ل سەری ئاماژەپێکری.
لەوما لداویێ دخوازم بێژم:
نەوشێروان،بڕاستی نەک هەر تەنێ سەرکردەوپێشمەرگەکێ کوردێ قارەمان وب ئەمەک ووڵاتپاریزێ خاک وگەلێ خو بوویە،بەلکو ئەو بیرمەند وفەیلەسوف بوو،ژیاندۆست بوو،مرۆڤدۆست بوو،هەروەسا سرۆشتدۆست بوویە.
هزار سڵاڤ ل گیانێ تەیێ پیرۆزبن ئەی رێبەرێ گەلێ ستەمدیدە،ئارام بنڤە،سوزبیت بەردەوامبین لسەر رێبازا تە..