رێکەفتنا هەسەدێ ودیمەشقێ،چ دپشتڕا هەیە؟!
10/14/2019 1:37:00 PM
حاجی ڕێکانی
پشتی پێنچ روژوشەڤێن رەبەق ژشەرەکێ مان
ونەمانێ،کوئیدارا خوسەری لروژاڤا وهێزا وێ(هێزێن سوریا دیموکرات)پێ رابووی ل دژی
لەشکەرێ تورک وچەتەیێن تیرورست ئەوێن بناڤێ(لەشکەرێ محمد)ی هاتین نیاسین وب
فەرمانا ئەردوگانی هێرش ئینایە سەرروژاڤا،دیارە هەر ئێکسەر گەلێ مە لروژاڤا هەناسا خو هەلکێشا وئارامییەکا دەمکی دێ روژاڤا
ڤەگریت.ئەڤەژی هەلبەت ژئەنجامێ وێ رێکەفتنا مەیدانی هات ئەوا دوهی١٣/ئوکتوبەر
بەرێز سالح موسلم وهەڤالێن وی ل ئیدارا خوسەر بچاڤدێریا روسیا،دگەل حکومەتا
مەرکەزی مورکری کو لەشکەرێ سوریێ ب ئەرکێ خو رابیت بو پاراستنا خاک وسنوورێن سوریێ
وبەرەڤانیێ بکەت ول دژی لەشکەرێ تورکێ داگیرکەر براوەستیت.
هەر چەندە نهو ب تەمامی دیارنینە رێکەفتن ب
چ شێوەیە وژچەند خال وبەندان پێکهاتیە ورەهندێن وێ چنە هەم لسەر ئایندەیێ سیاسی یێ
روژاڤا وەک کیان ووەک دوزا گەلەکێ مافخواری، وهەمژی وەک پرسگرێکا سوریێ ودەڤەرا ناڤین
بگشتی؟! چنکو نهو تەنها رێکەفتنەکا مەیدانی هاتیەکرن وپشتی چەن روژەکێن دیتر،وەکو
بریار،بەرپرسێن ئیدارا خوسەر دگەل حکومەتا مەرکەزی دێ دگەل ئێک رووینن ودەست ب دانوستاندنا
کەن. لێ بدیتنا من ئیدارا خوسەر وبتایبەتی بەرێز سالح موسلم بڤێ رێکەفتنێ وەک
تەکتیکەکا مەیدانی وسیاسی هەنوکەی، کارەکێ ژیرانە پەیرەوکریە،نەمازە دەما دبینین
رێکەفتن ددەمەکێدا هاتیەکرن کو روژاڤا وەک کیان،وەک گەل،وەک ئیدارا سەربەخو،بەرەڤ
نەمانێ دچوو، بەرەڤ کارەساتەکا مروڤی یا هەرە مەزن دچوو،بویە ژنەچاری ئەڤ پێنگاڤە
بلەز هاتییەهاڤێتن.
لێ بڤێ رێکەفتنێ ئاماژە بو هندێ دچن کوژنهووپێڤە
ئاراستەی روویدانان وپێشهاتێن سیاسی ومەیدانی هاتنە گوهورین ونهو پرسا روژاڤا وروویدانێن
وێ، ڤان رەهندان بخوڤەدگریت:
١.پیلانا ئەردوگانی هاتە تێکدان
وپوچەلکرن،کو ئەوژی قرکرنا نفشێ کوردی بوو ژلایەکێ وژلایەکێ دیڤە،سنووردارکرنا
هێزا وی یا داگیرکەر،کو دویرنابینم ئەڤ چەندە دماوەکێ نێزیکدا دێ ب نەگەتیڤی کاریگەریا
خو لسەر ئایندەیێ ئەردوگانی وپارتا وی وناڤخویا تورکی یا سیاسی وئابووری بگشتی کەتن.وبدیتنامن
ئەردوگان دڤێتن ئێک ژ ڤان دوو رێکا ب هەلبژێریت:یان رێکەفتن دگەل روسیا وحکومەتا
دیمەشقێ وپاشکەشکرنا لەشکەرێ خو وبهێلیت چارەسەرکرنا دوزا کوردی دچواچوڤێ سوریادا
ب بیت،یانژی بەردەوامیێ بدەتە هێرشێن خو بوداگیرکرنا روژاڤا ب تەمامی!!.هەلبەت ب هەردوو
حالەتا شکەستنە هەر بو ئەردوگان وئایندەیێ وی وهەرژی بو دەولەتا تورک وناڤودەنگێ
لەشکەرێ تورکی.
کەواتە پێگەهێ تورکیا یێ ناڤخوی ویێ
دەرەکی بگشتی دێ پتر سست وخاڤ بیت.
٢.ئیدارا خوسەر بڤێ رێکەفتنێ خو ژ شەرەکێ
بێهودە قورتالکر،وشەرەکە ئێخستە دناڤبەرا تورک ولەشکەرێ سوریادا.
٣.گرتیێن داعش ومەترسیا وان وچارەنڤیسێ
وان مانە دناڤبەرا هەرچوار دیوارێن زینداناندا ئەوێن لژێر کونترولا هەسەدێدا.
٤.بو هەمی لایەکێ دیاربوو کو کورد بتنێ
نینن،وئێدی وپاش حسابەک باشتر دێ دگەل هێتەکرن ودێ بو هێتەکرن.
لێ لڤێرە ئێک پرسیار هەیە کو دبیتن گەلەک
ژمە ل بەرسڤا وێ بگەریێن کو ئەوژی:
ئەرێ گەلو کی دبێژیت کو ئەڤا هاتی کرن دبنەرەتدا
حەز وئارەزوو یا هەر ئێک ژ روسیا وئەمریکا وتورکیا وئیرانێ وسوریێ نەبوو؟کی دبێژیت
پلانەک نەبو پێشوەخت هاتبیتە دارشتن کو تورکیا لەشکەرکێشیێ بکەتە سەرروژاڤا پێخەمەت
روژاڤا نەچاربیت رێکەفتنێ دگەل رژێما ئەسەدی بکەت وپاشی داخوازێ ژێ بکەت لەشکەرێ
خو بینیت داکو سنورێن سوریێ ژباکوریڤە دگەل تورکی بگریت وبڤێ چەندێ هەرێما سەربەخو
یا کوردان ب ئێکجاری نەهێلن؟!
هەلبەت دگەل پێشهاتێن نوی دروژێن
داهاتیدا،ئەڤ بەرسڤە بساناهی دێ کەڤیتە بەردەستێ مە هەمیان،ئەڤجا بلا چاڤەرێبین.