وتار

لە خەمی گیرفانەوە بۆ خەمی مێشک!

8/9/2020 3:24:00 PM 96 جار خوێندراوەتەوە
د. موئمین زەڵمی



- مرۆڤیان ئازاد کرد، بەڵام تەنها گیرفانی ئازاد کرا نەک مێشکی، بە پێچەوانەوە مێشکەکان داگیرکران، بیرکردنەوەکان تەلبەند کران، ئێستا لە مرۆڤ بە گشتی و  تاکی کوردی داگیرکراوتر نیە، زۆرجار خۆزگە دەخوازین "داگیرکەرێک" وڵاتی داگیردەکردین و وەک وڵاتانی کۆڵەنایزد، هەموو شتێکمان بە دەست زلهێزێکیترەوە دەبوو، بەڵام ئێمە وڵاتمان بە دەست خۆمان و ژمارەیەک زلهێزیترەوەیە و مێشکمان داگیرکراوە.

- سەرنج بدەن، رووداو و ئێن ئاڕ تی و کەی 24، رۆژانە قورمیشی مێشکمان دەکەن، دابەشیان کردووین، کەناڵی ژمارە یەکەمی تەلەفزیۆنەکەت کامیانە تۆ سەر بەو مەدرەسەیە میدیایی و ماکینەی ئیعلامییەی، بە دڵی ئەوان بیردەکەینەوە، بە ئاوازی ئەوان هەڵدەپەڕین، بە نەمەتی ئەوان چاو دەتروکێنین، هەواڵ و راپۆرتەکانیان لە مەجلیسی قسە خۆشەکانماندا ئاڵوگۆڕ پێ دەکەین.

- هەندێک لە پسپۆڕان و هاندەران بیرکردنەوەی تەندروست یان ئەوەی پێی دەوترێت "بیرکردنەوەی ڕەخنەیی" پێیان وایە، ئەو مرۆڤانەی سەیری تەلەفزیۆن دەکەن و گوێ لە هەواڵ دەگرن ئیتر بیر ناکەنەوە، گریمان ئەمە رێژەییش بوو، ئادەی کوا دەرئەنجامی بیرکردنەوەی پێنج ملیۆن دانیشتووی هەرێمی کوردستان، ئەگەر یەک لەسەر سێی ئەم دانیشتوانەش بیر دەکەنەوە، دیسان کوا دەرئەنجامەکەی، چیمان سەوز کرد؟

- پارتی و یەکێتی و گۆڕان و نەوەی نوێ و کۆمەڵ و یەکگرتوو، خۆیان و سەرۆک و سەرکردەکانیان، خۆیان و ئاراستەکانیان، خۆیان و فیکر و دونیابینی و دیدگا و پەیڕەو و پڕۆگرامیان، لە جیاتی ئێمە بیر دەکەنەوە، هەر ئەوانن سیاسەتمان پێ دەڵێنەوە، شەقاممان پێ دەجوڵێنن، حکومەتمان لێ دەکەنە ئەژدیها، ئۆپۆزسیۆنمان لێ ئەتۆرێنن، هەر خۆیانن، بیرمان بۆ دەکەنەوە، رابردوومان پێ دەفرۆشنەوە، ئەمڕۆمان پێ تەنگەتاو ئەکەن و سبەینێ مان بۆ دەڕازێننەوە.

- تاکی کوردی، خۆی ناخەوێت، خۆی ناخوات، خۆی یاری ناکات، خۆی نانوسێت و ناشخوێنێتەوە، هەموو شتێکمان بۆ دەکەن، وەک بڵێی ئێمە ئەو قەشە و مەلا پیرۆزانە بین، کە پێویست نەبێ دەست بکەین بە ئاودا، ئەوان هەموو شتێکمان بۆ دەکەن.

- هاوڕێیەک باسی شکستی ئۆپۆزسیۆنی نوسیبوو، لە کۆمێنتێکدا بۆم نوسی، " زۆرینەی ئەوانەی لە رابردوودا خۆیان بە ئۆپۆزسیۆن ناساند، کەوتنە بەرداشی دەسەڵات و قەرەباڵغییەوە، کەوتنە نێوان هەڵبژاردەیەکی زۆر خراپەوە، ئەوان بۆ ئەوەی لە شەقام و قەرەباڵغی نزیک ببنەوە ناچار بوون دەسەڵات بکەنە شەیتان، دواییش کە نزیکی دەسەڵات کەوتنەوە بە تەواوتی پشتیان لە خەڵک کرد نەکا قسەکانی دوێنێیان پێ نیشان بدەنەوە، لە راستیدا ترس لە قەرەباڵغی ئەوەندەی ترس لە دەسەڵات مەترسیدارە، ئۆپۆزسیۆن تاکی کوردی پڕ کرد لە درۆ و خەونی شیرین و رازاوە لە بەرامبەردا متمانەی بە حکومەت و دەسەڵات لە ناوبرد، ئێستا ئەگەرچی لە دەسەڵاتیشدا بێت تازە ناتوانێ ئەو متمانەیە بسەنێتەوە، تاکی کوردی ئێستا کوشتەی دەسەڵات و ئۆپۆزسیۆنە، بۆیەش بیرکردنەوەشی کوژراوە." بە کورتی دوو ترس لەکۆمەڵگەی ئێمەدا زۆر زەق بوونەتەوە و ترس لە دەسەڵات و ترس لە شەقام، ترس لە قەرەباڵغی و شەقام هیچی کەمتر نیە لە ترس لە دەسەڵات ... رەوتی سیاسی سلێمانی لە پێناو کەمکردنەوەی ترس لە قەرەباڵغی هەموو شتێکی کرد و دواجار دۆڕان بوویە بەشی ئاراستەی سیاسی و زەحمەتە تا چارەکە سەدەیەکیتریش دەرفەت بڕەخسێتەوە بۆ خەمخواردنی خۆرسک و خواستی چاکسازی گشتی.

- حزبەکان ئامانجی سیاسی تاکی کوردیشیان خەفە کردووە، یانی تەنانەت لە کاتی هەڵبژاردنیشدا نایەڵن تاک بۆ خۆی بیربکاتەوە، ئاخر هەڵبژاردن یانی هەڵبژاردن، کەچی لێرە بۆشمان هەڵدەبژێرن. ساڵی 2018 کە لە هاوپەیمانی بۆ دیموکراسی و دادپەروەردی دا بووین بەشداری هەڵبژاردنی ئەنجومەنی نوێنەرانی عێراقمان کرد، بەڵام لە جیاتی ئێمە دەنگیاندا و بۆیان هەڵبژاردین، دواتر د. بەرهەم ساڵح سەرۆک و بەشێک لە هاوڕێکانی گەڕانەوە ناو یەکێتی، لەگەڵ بەشێک لە هاوڕێکانم پێشنیاری ئەوەمان کرد، با فۆڕمی کاری سیاسی بگۆڕین، چونکە ئەوانەی لە باکگراوندی نائایدۆلۆجییەوە هاتبوونە ناو هاوپەیمانی زۆرینەیان گەڕابوونەوە، من پێم وابوو کە ناوەندێکی ئەکادیمی، میدیاییەکی ئامانجدار دروست بکەین زۆر لە حزب باشترە، دواتر ئەوە بوو بە ڕای زۆرینە درێژە بە حزب درا و هاوپەیمانی نیشتمانی دروستکرا، پرسیاری سەرەتا و کۆتایی  ئەوەبوو کە ئامانجی سیاسی ئەم حزبە چی دەبێت، لە بەرامبەردا "گەشتنە دەسەڵات" وەڵامی ئامادە و مەتاتیە هەمیشەییەکە بوو، کەچی دوایی هەر لە ژێر هەژموونی ئەو بیرکردنەوەی حزبیانەی پێشتر باسم کرد، ئامانجی سیاسی نەک حزب بەڵکو تاکەکانی ناو حزبەکەش گۆڕدرا، ئامانجەکە شێوێنرا و لێڵایی باڵی کێشا بەسەر بارودۆخەکەدا، ئەمە بۆ ئەوانیتریش راست دەرچوو.

- ئێستا مرۆڤ لە جیهاندا تەنها خۆی نیە، رووبەرووی زۆرترین شتیتر دەبێتەوە کە زۆرینەیان لە توانایدا نین،
هەر لە رووداوە سروشتییەکانەوە تا  شپرزەبوونی سەرزەوی بە زۆری ژمارەی دانیشتوانەوە، تا گۆڕانی کەشوهەوا، تەکنەلۆجیا و بازرگانی بە هەموو شتێکی مرۆڤەوە، تیرۆر و کوشتن و بڕین، ئەمانە هەموویان فاکتەرێکن بۆ رێخۆشکاری لە داگیرکردنی مێشک.
مرۆڤی ڕۆژهەڵاتی قوربانییەکیتری ئەو بارودۆخە ناسازەیە جیهانی گرتۆتەوە، جا قوربانیبوونەکەی ئەم بە رەنگێکیترە، رۆژهەڵات پڕە لە نەوت و ئاو و زێڕ و کانزا و دۆلار و ئۆتۆمبێلی گرانبەها، بەڵام مرۆڤی تیا نیە! هەمووان خەتابار و هەمووان قوربانین، ئەم گەمژەیەتییەی لێرە دەگوزەرێت، کۆیلایەتی تاوی پێ دەسەنێت و مێشکپووتی کڵپەی لێ هەڵدەسێنێت، سەرنج بدەن، شەڕی ناوخۆی نێوان هاوڵاتیانی هەرێم و وڵاتە جیاوازەکان هەر بەردەوامە. مرۆڤی رۆژهەڵاتی، هەر دەڵێی قوربانیی سوتانی تیشکی رۆژە، نە ساتێکی هەیە بۆ پشوو، نە ساڵێکی هەیە بۆ ئارامی، هەرچی بەڵاو و چەرمەسەری و ناخۆشییە، هەرچی تەقینەوە و قەتڵوعام و کوشت و بڕە، هەرچی فەقیری و داماوی و بێ دەرەتانییە، دەڵێی لە ڕۆژهەڵاتەوە هەڵهاتووە. هەرچی بیری توند و ناتەندروست و وەحشیگەری رۆژئاواشە لێرە گەرمی دەبێتەوە، دەبێ رۆژی ئێرە لێی بدات، بۆیەش لەوێ لە لەوەڕی زیندانەکان دووری دەخەنەوە و هەناردەی ئێرەی دەکەن و لێرەش دەبێتە بەڵای گیانی خەڵکی ستەمدیدە.

- لێرە، نە پسپۆڕی گرنگی پێ دەدرێت نە بڕوانامە و هەوڵدان، لە هەرچی شتێک پێتخۆشە دەتوانی قسەی بکەین، جاران کەسێک هەبوو پێی دەوترا نەخوێندەوار، کە توانای خوێندنەوەی و نوسینەوەی نەبوو، خولی فێرکردنی خوێنەواری لە گوندەکان دەکرایەوە، بەڵام ئێستا دەبێ بڵێین، نەخوێنەوارەکانی سەدەی 21 ئەو کەسانە نین کە نازانن بنوسن و بخوێننەوە، بەڵکو ئەوانەن کە لە هەموو شتێکدا قسە دەکەن و لە هەموو بوارێکیشدا دەنوسن.

- بارودۆخەکە هێندە شپرزە، لە پێناو ئەو کۆتوبەندەی مێشکی داگیرکردووین، کە ئازادی و سەربەخۆیی داراییشی لێ زەوت کردووین، کاتمان بەشمان ناکا، پێمان وایە کاتی دەوڵەمەندێک وەک ئێمە بیستوچوار کاتژمێر نیە، ئەوەتا رۆشنبیرەکانیشمان بوونەت قوربانی، هاوڕێیەک پۆستی کردووە: "کتێبخانەیەک هەیە سەروو هەزار کتێبی تێدایە. کتێبی زۆر باش و هەمەجۆر، بە هەردوو زمانی کوردی و عەرەبی، خاوەنەکەی هەموویان بەسەریەکەوە (واتە هەموو کتێبەکان بەیەکەوە، نەک بژاردن) دەفرۆشێت (بە دۆڵابەکانیشەوە)." ئاستی ژیان بگاتە کتێبفرۆشی، بارودۆخ هێندە نالەبار بێت بگاتە ئەم ئاستە، کوا ڕۆڵی بیرکردنەوەی خۆمانە؟

- راستە متمانەبەخشین بە هەموو کەس باش نیە، بەڵام ئەوەی کە متمانە بە هیچ کەس ناکەی دەردو بەڵا گەورەکەیە .. ناکرێ هەرکەس، هەر بەرپرسێک و تەنانەت خودی حکومەتیش هەرچی وت تۆ بڵێی "درۆ" دەکات، ژیان بەم بێ متمانەییەوە لەنگە، ئێمە چەندە داکۆکی لەسەر گێڕانەوەی متمانە دەکەینەوە دەبێت ئەوەندەش ئامادەگیمان تێدا بێت بۆ قبوڵکردنی متمانە!

- کێ خەمخۆری راستەقینەیە، لە دەسەڵات گەڕێن، ئۆپۆزسیۆنیش هەرواوە، کوردستان ئەگەر تەنها رۆشنبیرەکانی، رۆشن کەرەوە و رۆشن بین و ڕۆشن بیر بوونایە، هەرگیز ئەم بارودۆخە نالەبارە رووبەروومان نەدەبوویەوە، چینێکی تەوەزل کە هیچیان لە دەست سەوز نابێت، جیلێک کە بە دوو دەعوەتی ئەوەی نەشێ و بشێ پێیان دەنوسرێ، مەعقولە تاکی کوردی لە خراپترین و کەموێنەترین تراجیدیای ژیانیدایە، هەر وێنەیەکی گۆشەیەکی ژیانی بگری دڵ دەکاتە ئاو، کەچی 5000 مەزرەعەی ئەم وڵاتە بەشێکی زۆریان هی ڕۆشنبیرەکانن .. نائومێدی گەورە لێرەوە سەرچاوە دەگرێ، گروپێک، دەستەیەک، چوزانم تیپێکی رۆشنبیری تەندروست نەماوە هیچ نا ڕاوێژێکی پێویست بداتە ئەم حکمڕانی و حزبڕانییەی هەرێم، ئەم قسەیە نەک بۆ ئێستا بۆ پانزە ساڵ پێش ئێستاش هەر دروستە، ئەوەی کراوە عەقڵی سیاسییەکانە و هەر ئەوەندەی بڕیوە، چما ڕۆشنبیرێک هەبووە ڕاوێژێک بدات؟

سۆشیال میدیا

ڕۆژنامەی زەمەن

Advertisement