جەنابێ پارێزگار خەلک چاڤەرێ ڤێ نەبون!
5/21/2020 3:30:00 PM
109 جار خوێندراوەتەوە
موئەید ئەحمەد
ل جھێ جەنابێ تە ھاتبا د کۆنگرەکێ رۆژنامەڤانی دا ڕونکرنەکێ بدەت و داخازا لێبۆرینێ ژ خەلکێ دھۆکێ و کەس و کارێن مامۆستایان بکەت ژ بەر وێ سەرەدەریا خراب و نە ژ ھەژی یا دگەل خرڤەبویا ھاتیەکرن ل ئێڤاریا ۵/۱٦ ژ لایێ ھێزێن ئێمناھێی ڤە تو دھێی ب زمانەکێ زڤر و عەقلیەتەکا تەمام حزبی و بەرتەسک دەست ب توھمەت پاڵدان و سفکایەتیێ ب وان کەسێن خرڤەبون ئەنجامدایی و ب لایەنێن سیاسی و ب ھەمی یاسایێن کارپێکری ل ھەرێما کوردستانێ دکەی.
بەحسێ عیناد و تەحدایێ دکەی ب شێوەیەکێ گەلەک کرێت و مامۆستایان حساب دکەی کو داردەستێن لایەنێن سیاسی نە و بۆ مەرامێن خۆ بکار دئینن کەکێ پارێزگار ئەم مامۆستایی گەلەک ژ دیتنا وە مەزنتر و جوانتر دبینین.
حکومرانی و ئیدارەدان ب ڤێ عەقلیەتێ ناھێتە کرن.
کاک فەرھاد تە د گۆتنێت خۆدا بشێوەیەکێ بەحس ل دەنگێن پارتی و لایەنێن دی کر ئەگەر ئێک یێ نە شارەزا بیت دێ ھزرکەت کا چ جورە ھەلبژارتنەک لڤێ پارێزگەھێ ھاتیە ئەنجامدان ئەم و ھین و ھەمی خەلکێ دھۆک باش دزانین کا ئەڤ دەنگێن تو بەحس ژێ دکەی دەرئەنجامێ چ جورە ھەلبژارتنەکێ یە و کا چ ھاتیە کرن و چەند ژ خەلکێ دھۆکێ بەشداری ھەلبژارتنا کریە و تە ژ بیر کر کو چوار ژ کۆمسیارا ئەڤ ئەنجامە پەسەند نەکرینە ئەڤجا سوکایەتیێن وە چ رامان و راستی ژ بۆ نینە.
چونکی پارتا تە ژی نیڤا ئەو موچەخورێن ل سلێمانیێ ھەی دەنگ نە ئیناینە
دیسان تو دبێژی ھندەک لایەن یێ خەونا ب ھندێ ڤە دبینن دەسھەلاتێ ل دھۆکێ ژ دەستێ پارتی بینە دەر نەخێر تویێ خەلەتی بەلکو ئەم خەونێ ب ھندێ ڤە دبینین ھوین ب چاڤێ دوژمنا لایەنێن بەرامبەری خۆ نەبینن و ئەم ھەمی لایەنێن سیاسی ل دھۆکێ ھەڤرکیەکا پاقژ و سەردەمیانە بکەین ل سەر بەرنامێن خۆ بۆ خزمەتکرنا خەلکێ باژێرێ خۆ و ھەرێما کوردستانێ د ھەلبژارتنەکا پاقژ و بێ سەختە و ترس و دەلیڤا بانگەشێ و پێشکێشکرنا بەرنامێ ھەلبژارتنا یا وەکھەڤ بیت بۆ ھەمیا.
ڕاستیەک یا ھەی دڤێت پارێزگار و رێڤەبەرێن دھۆک بزانن ئەوژی ئەوە کو ئەم دگەل ھەر لایەنەکێ بین ئەم کور و کچێن ڤی باژێری نە ئەم نە مێھڤان و پەنابەرین ئێش و ئازارێن ڤی خەلکی یێن مە ژی نە و ب ھەمی ھێزا خۆ ئەم یێ دگەل خەلکێ خۆ ئەم پشتەڤانێن خەلکێ خۆینە ھیچ کەسەک نەشێن ڤێ راستیێ بگوھریت.
نەرازیبونێن خەلکی نەبتنێ موچەیە بەلکوژ ھەوەیە ئەوێن ھین دھۆکێ برێڤە دبەن چونکی دەمێ خەلک کوچک و ڤێلا و باغ و مەزرەعێن ھەوە ل سەرێ چیا و گرێن دەوروبەرێ دھۆک دبینن عاجز دەمێ واستەیێ و نەدادپەروەریێ دبینن عاجز دبن.
دەمێ دبینن یاسا بەس بۆ ھەژاری یا ھەی تورە دبن و دەمێ ھوین پەنایێ بۆ سەرۆک عەشیرەت و مەلایێن دوژمنێ دینی و خەلکی دبەن و مێھڤانداریا بۆ دانن و خەرجیێن کوچکێن وان دکەن خەلک عاجز دبن.
ئەم دبێژین دەمێ ھندێ ھات کو ڕێڤەبەرێن دھۆک یێت حزبی و حکومی ڕاستیا نەڤەشێرن بۆ پلە و پۆست و ئیمتیازاتێن خۆ بەلکو چ ڕاستیا واقعی بگەھینە سەرکردایەتیا خۆ نە ھەر گاڤا کێشەک دروست بو نەبێژن خەتایێن فلانی نە و دەستێ فلانی یێ ل پشت چونکی تازە کەس باوەر ناکەت.