راستە کارەبای هەولێر فرۆشراوە بە عێراق؟
12:53 - 06/06/2026
زەمەن - هەواڵ
ئومێد خۆشناو
وەڵامی پەرلەمانتارێك دەداتەوەو هۆکارە ڕاستەقینەکانی کەمبوونەوەی کاتژمێرەکانی
کارەبا ئاشکرا دەکات و مژدەی پاکبوونەوەی ژینگەی شارەکەش رادەگەیەنێت
ئەمڕۆ شەممە ئومێد
خۆشناو، پارێزگاری هەولێر ڕایگەیاند، کەمبوونەوەی کاتژمێرەکانی پێدانی کارەبای نیشتمانی
بۆ دوو هۆکاری سەرەکی دەگەڕێتەوە، کە بریتین لە:
یەكەم: کەمیی بەرهەمهێنان
بەهۆی کەمبوونەوەی گاز لە کێڵگەکان
دووەم: زیادبوونی
خواستی هاونیشتمانیان بۆ بەکارهێنانی کارەبا بەهۆی بەرزبوونەوەی پلەکانی گەرما.
پارێزگاری هەولێر ئەو دەنگۆیانەی ڕەتکردەوە کە
باس لە فرۆشتنی زیاتر لە 1,000 مێگاوات کارەبا بە حکومەتی عێراق دەکەن، کە پێشتر لەلایەن
بەشێک لە پەرلەمانتارانەوە وەک هۆکاری کەمبوونەوەی کارەبا ئاماژەی پێدرابوو.
پارێزگاری هەولێر
ئاماژەی بەوە کرد کە لەگەڵ بەرپرسانی پڕۆژەی ڕووناکی و وەزارەتی سامانە سرووشتییەکان
بەدواداچوونی وردیان بۆ ئەم کێشەیە کردووە. خۆشناو جەختی لەوە کردەوە کە بڕیار وایە
لە چەند ڕۆژی داهاتوودا کێشەی دابینکردنی گاز بۆ وێستگەکانی بەرهەمهێنان چارەسەر
بکرێت و بەو هۆیەشەوە دۆخی پێدانی کارەبا بە هاونیشتمانیان ئاسایی ببێتەوە.
هەر ئەمڕۆ لە کاتی کردنەوەی پارکێکی نوێدا لەهەولێر ، ئومێد خۆشناو ڕایگەیاند کە
دوای چەندین ساڵ لە خراپیی کوالێتی هەوا، ئێستا ژینگەی هەولێر پاکبووەتەوە. پارێزگاری
هەولێر ئاماژەی بەوە کرد کە کوالێتی هەوای شارەکە گەیشتووەتە ئاستی ستانداردە جیهانییەکان
و ئەمەش دوای گرتنەبەری چەندین ڕێکاری توند هاتووەتە دی.
بەگوێرەی گوتەکانی
پارێزگار، باشبوونی کوالێتی هەوای هەولێر ئەنجامی زیادکردنی ڕێژەی سەوزایی و سەپاندنی
ڕێکاری یاسایی بووە بەرامبەر ئەو کۆمپانیا و پاڵاوگانەی زیانیان بە ژینگە دەگەیاند.
هەروەها جێبەجێکردنی پڕۆژەی ڕووناکی و کوژانەوەی مۆلیدە ئەهلییەکان هۆکارێکی دیکەی
سەرەکی بوون بۆ کەمبوونەوەی پیسبوونی ژینگەی شارەکە.