کوردستان

دوا بۆچونی گۆڕان له‌سه‌ر سیسته‌می هه‌ڵبژاردن و ده‌نگدانی تایبه‌ت

10:04 - 10/08/2022 188 جار خوێندراوەتەوە

"زەمەن"


بزوتنه‌وه‌ی گۆڕان، بۆچونی وایه‌ كه‌ تۆماری ده‌نگده‌رانی به‌غدا بكرێته‌ بنه‌ما بۆ هه‌ڵبژاردنی په‌رله‌مانی كوردستان و ده‌نگدانی تایبه‌تیش تێكه‌ڵی ده‌نگدانی گشتی بكرێت.


یاسین حه‌مه‌ عه‌لی، رێكخه‌ری ژووری هه‌ڵبژاردنی بزوتنه‌وه‌ی گۆڕان، له‌باره‌ی پرسی هه‌ڵبژاردنه‌وه‌، به‌ "زه‌مه‌ن"ی وت: ئێمە سورین لەسەری ئه‌وه‌ی تۆماری بایۆمیتری دەنگدان لە کۆمسیۆنەکەی بەغداد وەربگیرێت و بکرێتە بنەما و زۆرینەی لایەنەکان له‌گه‌ڵ ئێمه‌دا له‌مه‌دا هاوڕان.

وتیشی: له‌گه‌ڵئه‌وه‌داین بازنەکانی هەڵبژاردن، چوار بازنە بێت و سیستمی دەنگدان سیستمی تێکەڵ بێت (سویدی) هەروەها پێشنیارمان خستوەتەڕوو کە‌ دەنگدانی تایبەت نه‌مێنێت و کۆمسیۆن دەتوانێت بە میکانیزمێکی گونجاو رێکی بخات

ئاماژه‌ی به‌وه‌شكرد، سه‌باره‌ت به‌ پشكی پێکهاتەکان، بۆ ئەوەی نوێنەرایەتیەکی راستەقینەیان هەبێت گرنگە تۆماری دەنگدەرانی تایبەت بەخۆیان هەبێت و بنکەی دەنگدانیان بۆ جیابکرێتەوە.

یاسین حه‌مه‌ عه‌لی، سەبارەت بە پێكهاته‌ی کۆمسیۆن، وتی: له‌گه‌ڵئه‌وه‌داین پارێزگاری لەو پشك پشكێنه‌ی ئێستا بکرێت و وەکو خۆی بمێنێتەوە، بەڵام ماف بدرێت بە لایەنەکان و گۆڕانکاری لە نوێنەرەکانی خۆیاندا بکەن و کەلێنەکان پڕبکەنەوە.

بزوتنەوەی گۆڕان لە ۳۱ی ۳ی ۲٠۲۱ەوە لەرێی فراکسیۆنەکەیه‌وه‌ هەمواری یاسای هەڵبژاردنی پێشکەش بە سەرۆکایەتی پەرلەمان کردوە، بەڵام بەهۆی ناکۆکی لایەنەکانەوە لەکاتی خۆیدا نەخرایە بەرنامەی کارەوەو پشتگوێخرا.

سۆشیال میدیا

ڕۆژنامەی زەمەن