ڕامانە شیعرێک
01:54 - 09/12/2021
جەمال حەمید- کولتوری زەمەن
لەم نیشتمانە،
ڕەشپۆشەی مندا،
نیوەی " تەمەنمان"
لەسەرقەبران و
پرسە و مزگەوتا، بە فیڕۆ دەچێ !
نیوەکەی دیکەش،
لەسەرەی نەوت و غاز و کارەبا
هەر لەکیس دەچێ !
کەچی بە
" عومریش" بۆت هەژمار دەکرێ !
لەم نیشتمانە
دزراوەی مندا،
نە گوڵی هیوای "مرۆڤ"
دەپشکوێ
نە داری خۆزگەی خۆپیشاندانیش،
جارێ بەر دەگرێ !
کەچی هەتا دێ، کۆشکوتەلاری
دز و گەندەڵکار، بە
"هەورا" دەچێ !
لەم نیشتمانە
خاوێنەی مندا،
ئەوەی کە جێگەی نیگەرانییە
لەدیدی حیزب و سەرۆکخێڵەوە
ئینسان، وەک "شمەک"
سووک سەرنج دەدرێ !
بەڵام قەت ناشێ، گەل
" هیوای" ببڕێ....!
8ی بەفرانباری 2021