کورد و تاوانبارانی مێژوو
2/27/2023 4:35:00 PM
پێشڕەو محەمەد
زۆر بە کورتیی
هەوڵی بەشێک لە سیاسەتمەدارانی کورد
بۆ هاوپەیمانیی لەگەڵ ئەو بنەماڵەیە لەوە دەچێت خەیاڵی ئەوە بکەن هیتلەر کوڕێکی لێ
بەجێماوە و باوەڕی تەواوی بە کارەکانی باوکی هەیە و جووەکان بێن لەگەڵی دانیشن و
سیاسەتی هاوبەشی لەگەڵ بکەن. بنەماڵەی ڕەزا پاڵەوی تاوانباری مێژوون، دامەزرێنەری
فاشیزمی ئێرانیی/فارسیی و ئێرانیزمن. هەر هەوڵێک بۆ کاری هاوبەش و نزیکبوونەوە بێ
ڕێزیکردنە بە هەموو ئەو قوربانیانەی لەسەر دەستی ئەم بنەماڵەیە بوونەتە قوربانیی.
هیوادارم و دووبارە هیواخوازم نەوە
پێشکەوتووخواز و ژیرەکەی ئەمڕۆی کوردستان هەرگیز ڕێگە بە شتێکی وەها نەدەن. لەبری
گەڕان بەدووی هاوپەیمانێتییدا لەگەڵ ئەوان، دەبێت ببنە دەنگ و هاوپەیمانی هەموو
نەتەوە و گەلە ژێردەستەکانی ناو جوگرافیای ئێستای ئێران. دڵنیام لەناو حزبی
دیموکرات و لەناو کۆمەڵەدا مرۆڤی زۆر ژیر و پێشکەوتوو هەن دژی ئەم پرۆسەیەن.
هیواکە ئەوەیە بەرژەوەندیی ڕابردووی قوربانیان و ئێستا و داهاتوو گەورەترە لە
بەرژەوەندیی بەرتەسکی حزبیی. هیوا بۆ داهاتوویەکی مرۆڤدۆستانەتر با گەورەتر بێت لە
ئایدیۆلۆژیا و بەرژەوەندیی حزب.
بنەماڵەی شا و کوڕەکەی حەمەڕەزا شا،
تاوانبارن، نەک پێشکەوتووخواز و دیموکراتیخواز. ئەوان ئێوەیان ناوێت، تەنها
دەیانەوێت وەک داشی دامە بەکارتان بهێنن. لە جووەکانەوە فێرببن کە ئێستاش بەدووی
تاوانباراندا دەگەڕێن دادگاییان بکەن. فاشیزم هاوڕێتان نییە، دوژمنتانە.
لاوازتریان بکەن، نەک بەهێزتر.