وەزیری ئاوەدانكردنەوە: پرۆژەی دووسایدی نێوان سەیدسادق بۆ پێنجوێن دەستپێدەكەین
12:32 - 30/11/2025
زەمەن – هەواڵ
دانا عەبدولكەریم، مژدەی دەستپێكردنی پرۆژەیەكی
ستراتیجی راگەیاند كە خزمەت بە تەواوی خەڵكی سنوری پارێزگای سلێمانی و هەرێم
دەكات.
پەیامنێری "زەمەن" لە سلێمانی ئاشكرایكرد؛ ئەمڕۆ یەكشەممە دانا عەبدولكەریم
وەزیری ئاوەدانكردنەوەو نیشتەجێكردنی هەرێمی كوردستان لەمیانی سەردانێكیدا بۆ
سنوری قەزای پێنجوێن و سەیدسادقی پارێزگای سلێمانی، ئاشكرایكرد كەلەمیانی
سەردانەكەیدا شەش پرۆژە بەسەردەكاتەوە كە پێنجیان خۆشبەختانە تەواوبوون و یەكێكیان
لە جێبەجێكردندایە كە كۆی گشتی ئەم پرۆژانە نزیكەی (3) ملیار دینارە كە
لەسەربودجەی وەبەرهێنانی وەزارەتی ئاوەدانكردنەوەو نیشتەجێكردن دروستدەكرێت.
دانا عەبدولكەریم هەر لە میانی سەردانەكەیدا هەواڵێكی خۆشی بۆ دانیشتوانی
هەردوو قەزاكە ئاشكراكردوو وتی" ئەمڕۆ هەواڵێكی خۆشمان بۆتان هێناوە كە زۆربەی
زۆری رێكارە پێویستیەكان دەستپێكردنی پرۆژەی دووسایدی نێوان هەردوو قەزای سەیدسادق
و قەزای پێنجوێن تەواوبووەو لە ئایندەیەكی نزیكدا رەزامەندی تەواوەتی دێتەوەو
بەدڵنیاییەوە لە داهاتویەكی نزیك كە پێدەنێینە ساڵی نوێوە دەچێتە بواری
جێبەجێكردنەوە".
رونیشیكردەوە كە ئەو پرۆژەیە یەكێكە لە پرۆژە گرنگ و ستراتیجیەكانی حكومەتی
هەرێمی كوردستان و وەزارەتی ئاوەدانكردنەوە، كە خزمەتێكی گەورە بە هەموو هەرێمی
كوردستان و بەتایبەتیش سنوری قەزای پێنجوێن و پارێزگای سلێمانی دەكات".
قەزای سەیدسادق و قەزای پێنجوێن دوو قەزای گەورەو گرنگی سەر بە پارێزگای
سلێمانین و ژمارەی دانیشتوانەكەی بە پێی
دوا سەرژمێری مانگی 10ی 2024، دانیشتوانی سەیدسادق بریتیە لە 93 هەزارو 247 كەس، هەروەها قەزای پێنجوێن
بەپێی هەمان سەرژمێری ژمارەی دانیشتوانەكەی بریتیە لە 52 هەزارو 251 كەس.