گەڕان -7
02:22 - 04/12/2021
ناڵە حەسەن-کولتووری زەمەن
هۆگری، هەستانەوە،
هەڵوەرین، کورد . چارەنووس، کەوتن، پایز، ئومێد، عەشق، خەمۆکی، قەدەر،
ڕاکردن، ڕەنگاوڕەنگ، نوێبوونەوە، ئێمە، نائومێدی، هاوار، بەرائەت، سروود،
گۆڕان، وێران، ژیان ،دڵشکاو، نیشتیمان، مردن، ڕاکردن ...!
1
( ...........)
خۆرەتاو هەموو بەیانییان
لە نێو خەیاڵەکانی من هەڵدێ
ئێوارانیش
لەنێو قژە خاوە نەرمەکەی تۆ
ئاوا دەبێ
پایزی هەموو ساڵێکیش
لەنێو عەشقی من دەست پێدەکات
و
دوا گەڵای
لەنێو خەونە سپییەکانی تۆدا
دەوەرێ
بۆیە هەمیشە
نیگای خەونەکانت زەرد و
قژە خاوە خومارییەکەت سوورێکی
خەنەییە / ئەی شۆخ
2
( ........... )
لەنێو گەلەری بوون
هەریەک لە ئێمە
تابلۆیەکی بێگەردی ناوازەین
وەلێ قەدەر / دواتر
بە ڕەنگە ڕەشەکانی مردن
ڕەنگمان دەکات
3
( ........... )
عەشق جگە لە نائومێدییەکی
نارنجی و
ژیانیش / جگە لە وەهمێکی شین
هیچیتر نییە
من وا ناڵێم
خەونەکانم لەسەر پارچە
کاغەزێکی گەچراو
ئەمەیان بۆ نووسیم
4
( ........... )
تۆ ئەو مرۆڤە نامرادە
ماندووەی
مەمکەکان و هەموو جەستەت
لە چاوەڕوانی ڕێبوارێکی لە
خۆت شەیداترە
تا دەمار بە دەماری عاتیفەت
پڕ بکات لە خۆشەویستی و
ڕووبارێکیش لە عەشقت پێ
ببەخشێ
5
( ......... )
گەنجێک بەتاڵ و عەتاڵ
لەگەڵ / خەون و خەیاڵە
نائومێدییەکانی
بەنێو شەقامەکانی شاردا
دەسووڕێتەوە
بە تەنیشت ئەمبولاسێکدا ڕەتدەبێ
دوای یەکدوو چرکە بۆی دەگەڕێتەوە
بە قەڵەم ماجیکێکی ڕەش
لەسەری دەنووسێ
ئێرە مەملەکەتی مردووەکانە
کەس پێویستی بە تۆ نییە
( ئەو گەنجەش / یەکێک بوو لە
دەرچووانی زانکۆ...! )
6
( ........... )
گوڵە حاجیلەکەی قەدپاڵی قەڵا
زۆر دەترسم
بێویستی خۆمان
دیدارەکەمان
بکەوێتە بەهەشتە غەمگینەکەی /
ئەو دونیا
7
( ........... )
لە نیشتیمانی من
مەرگ لە کۆنە تراکتۆرێک دەچێ
بە تڕەتڕ و تەقە تەق
جەستەی ژیان بەدوای خۆیدا
ڕادەکێشێ
8
( ........... )
وەرە بمبە
ئێرە / نیشتیمانی کوشتنی خۆرەتاو
و
داڕمانی قەڵای خەون و
شکاندنی پەیکەری هیواکانمە
وەرە بمبە / بۆ هەر جێگایەک
ئەی مرۆڤە خاکی و سپییەکە
بەس لە تاریکی ئەم دۆزەخە
ڕزگارم کە
9
( ......... )
ئەی پەپوولە شینە
باڵڕەنگینەکە
ئەگەر ڕۆژێک
سەردانی باخچەکانی دڵم نەکەی
شینی چاوی شیعرەکانم
شینی تریفەی شەوەکانم
شینی شەونمی بەیانییەکانم
کاڵدەبنەوە
خۆشم /
وەک گەڵایەکی چاو ڕەشی قژ
زەرد
لە دواهەمین درەختی پایزێکی
خەمناک
جیادەبمەوە
دڵۆپ دڵۆپ فرمێسکیش
بەسەر گەردنی ئومێدەکانم
شۆڕدەبنەوە
10
( ........... )
لەگەڵ گۆڕستان و مردن
ڕاهاتووین
لەگەڵ ژیان نا
لەگەڵ خوێن و خنکان و خۆکوشتن
ڕاهاتووین
لەگەڵ خەون نا
لەگەڵ چەمانەوە و کۆیلەبوون و
کڕنووش ڕاهاتووین
لەگەڵ شکۆمەندی نا
لەگەڵ جەنگ و کوشتنی ئەویتر
ڕاهاتووین
لەگەڵ عەشق نا
لەگەڵ دۆزەخ و ئازار و ئاگر
ڕاهاتووین
لەگەڵ ئازادی نا
چ بوونێکی بێ بەها و
چ تابلۆیەکی تەماوی و
چ تەیرە عەبابیلەیەکی
عەنتیکەی / ئەی کورد ...!
کۆتایی نۆڤەمبەری 2021
تێبینی: خوێنەری خۆشەویست ناونیشانی ئەم وردە شیعرانە
لەو وشانەی سەرەوە هەڵبژێرن ، هەندێکیان زێتر لە ناوێک لەخۆدەگرن . خۆتان ئازاد و
سەرپشک بن لە دانانی ناونیشانەکان ...!