پرسی کورد بۆتە پرسێکی جیهان-لۆکاڵی
7/3/2022 9:21:00 PM
لوقمان قهنبهری
دکتۆرا لە زانستە سیاسییەکان
وا دیارە لە سەردەمی ئێستادا پرسی کورد بۆتە
پرسێکی جیهانی-لۆکاڵی، واتە ئەگەر شتێک بەسەر کورد لە تورکیادا بێت، کۆمەڵگەی کوردی
دوور لە نیشتمان /دیاسپورا (سوید و فینلاند)
بێدەنگ نابێت. لە زۆر حاڵەتدا کوردەکانی ترانسناسیۆنالیزم لە پێوەندی لەگەڵ هاوڵاتیانی
کورد لەناو تورکیادا یارمەتیدەر بوون بۆ هاوکاری و باشترکردنی گوتاری کوردی.
لە ئێستادا ژمارەی دانیشتوانی ئەو کوردانەی لە
ئەڵمانیا دەژین دەگاتە یەک ملیۆن کەس. ژمارەی دانیشتوانی کوردی فەرەنسا سەد و پەنجا
هەزار کەسە و ئەوەی جێگەی سەرنجە زۆرێک لەو کوردانە بەشداری چالاکی سیاسی دەکەن. بۆ
نموونە لە ساڵی ٢٠١٦دا کوردانی دیاسپورا توانیان شەش کورسی پەرلەمانی سوید بەدەست
بهێنن و بێ گومان ئەم سەرکەوتنە کاریگەرییەکی زۆری دەبێت لەسەر ناساندن و لۆبی
کردنیان لە پەرلەمانەکانی ئەوروپا.
کوردانی دوور لە نیشتمان بە کەڵک وەرگرتن لە تەکنەلۆجیای
جیهانی بەشداری لە گوتاری ناسیۆنالیزمی کوردیدا دەکەن و ئەم بەشدارییە لە ڕێگای ئینتەرنێت
و ئامرازەکانی وەک ئیمەیڵ، ماڵپەڕ، فەزای مەجازی ئەنجام دەدرێت.
کاتێک ئەردۆغان داوای ڕادەستکردنەوەی چالاکانی
سیاسی و مەدەنی کورد لە سوید و فینلاند یان وڵاتانی ئسکاندەناڤیا دەکات، لە لایەکەوە
دان بە گرنگی و پێگەی کوردانی دوور لە نیشتماندا دەنێت لە بوژاندنەوەی ناسنامەی
کورددا، وە لە لایەکی دیکەوە نیشان دەدات کە بۆ ئەوەی لە کورد تێبگەین، میتۆدۆلۆژیای
جیهانی-لۆکاڵی دەتوانێت یارمەتیدەرمان بێت بۆ ئەوەی باشتر لە پێگەی کورد لە سەردەمی
جیهانگیریدا تێبگەین.