وتار

ئۆکرانیا خۆڕاگری یان نەزانی . . دەرسێک بۆ کورد !

5/17/2022 11:32:00 AM 111 جار خوێندراوەتەوە
پیشرەو رەئوف

ئەوەی ئێستا لە ئۆکرانیا ڕوودەدات لە کاولکاری و لە سوتان لە ناو جەنگێکی مەترسیداردا ئەوە نەتیجەی نەزانی میللەتێکە کە هەرزە و کەم ئەزمونێکی وە ک زیلینسکی بکاتە سەرۆکی ووڵاتەکەی و ئەویش بە مەبەست یان بێمەبەست ئاوا ووڵاتێک بە گورگان خواردوو بدات  کە سەرەنجام ئەمڕۆ یاسبەی هەردەبێ بەسەری شکاو و تێکشکاوەوە تەسلیم ببێت.

 زیلینسکی ئەگەر سەرۆکێکی ژیر و دڵسۆز و نیشتیانپەروەر بوایە ئۆکرانیای نەدەخستە ناو شەڕێکی ناهاوسەنگ و نابەرامبەرەوە ، دەبوایە حسابی بۆ پێگەو جیۆپۆلەتیکی ئۆکرانیا بکردایە دەبوایە حسابی بۆ ئەوە بکردایە  کە ووڵاتەکەی لەکوێی هاوکێشەی ئابوری و سیاسی و سەربازی و لۆجستی دەوڵەتێکی گەورەی وەک ڕوسیادایە ، دەبوایە گەلی ئۆکرانیا بیانزانیایەئەوەی زلینسکی دەیکات سەرکێشیە و دروستکردنی مەترسیە بۆ سەر ئاسایشی نیشتیمانی ڕووسیا و مەحکومکردنی ڕوسیایە بەبەرپاکردنی شەڕ ، بۆیە ڕوسیا ناچار کرا  یان دەبوایە ئامادە بێ بۆ لێکهەڵوەشانەوە یان دەبوایە شەڕ بکات ، وەک خۆیان ڕایانگەیاند کە یان دەبێ جیهان نەمێنێ یان دەبێ ڕووسیا بمێنێتەوە ،  زیلینسکی  چیدابوو لە ناتۆ و ئەمریکا .

  ئەمریکا خێری بۆ کێ داوەتەوە تاکو بۆ ئۆکرانیای بداتەوە . . ئەمریکا کوێ هەیە پێی تێنابێ و کاول و ڕسواو و ڕەزیلی نەکردبێ . . ئەمریکا لە سەد ساڵی ڕابردوودا و لە سەردەمی سەرۆک ماکینلییەوە لە ١٨٩٣ وە تاکو سەرۆک تیۆدۆر و ڕۆزفێڵت و تافت و سەرۆک بوشی باوک و کوڕ بۆ شەڕی کەنداو و داگیرکردنی ئەفغانستان و عێراق پڕوپاگەندەی ئەوەیان دەکرد کە خوازیاری سەقامگیری و ئاشتی و دیۆکراسین ، بەڵام سەد دەرسەد بە پێچەوانەوە ئەمریکا لە هەر ووڵاتێک بونی هەبوبێ نە ئاشتی و نە ئارامی و نە دیمۆکراسی بوونی نەبووە ئەمەش بەدەلیلی ئەوەی کە ئەمریکا تەنیاو تەنیا پشتیوانیان لەو حیزب و دەسەڵات و حکومەتانە کردووە  کە دانیشتوانەکانیان ڕقیان لێیا دەبوەوە .

 بۆیە  بە پێچەوانەوەی پڕوپاگەندەکانەوە  ئەمریکا کۆمەڵێک ڕژێمی ڕوخاند  وەک ئێران و گواتیمالا وچیلی لە پەنجاکانی نیوەی سەدەی بیست  کە لەڕێگەی هەڵبژاردنی ئازادەوە گەیشتبونە دەسەڵات و چەند  ڕژێمێکی دیکتاتۆری خستە شوێنیان .

بە گشتی ئەمریکا   چی بەسەر گەلان و ووڵاتانی ئەفریقای باشور و ئەمریکای لاتین و بەشێک لە ووڵاتانی ئاسیاو ڕۆژهەڵاتی ناوەڕاست نە هێناوە کە دەبوو گەلی ئۆکرانیا سودیان لەم مێژووە ڕەشە ببینیایە ، زیلینسکی لەبری زەمینەسازی بۆ شەڕ و بۆ جێبەجێکردنی  ئەم پیلانەی کە ئەمریکا نەخشەی بۆ کێشابوو هەوڵیان بدایە  سودیان لە سەربەخۆیی خۆیان وەرگرتایە ، ووڵاتیان پێشبخستایە و پێشبڕکێی زانستی و پیشەسازی و  تەکنۆلۆژیان بکردایە، نەک ئامادەکاری بۆ شەڕێکی دۆڕاو ، بۆیە ئەو گەل و نەتەوانەی وەک ئۆکرانیا لە خشتە براون  هەق وایە بڕۆن جارێکی تر مێژووی ڕەشی ئەمریکا بخوێننەوە و ئەم جۆرە پاڵەوانە درۆزنانەی وەک زیلینسکی بناسن کە لە هیچەوە و لە تاریکیدا هەڵیان دەتۆقێنن و گەلێکی پێ لە خشتە دەبەن.

ئەوجا تێدەگەن کە تاکو ئەمریکا بەشوێن ئەوەوە بێت کە خۆی وەک تاکە هێزێکی پاوانخواز و بێڕکابەر  ببینێتەوە مەحاڵە گەلان و مرۆڤایەتی ئارام و ئاسودە بژین.

ئەمەش دەبێت وانەیەک بێت بۆ کورد و حوکڕانانی هەرێمی کوردستانیش کە خۆیان  نەخەنە ناو گێژاوی نەخشەو پیلانەکانی ڕۆژئاوا و ئەمریکاوە ، بەتایبەتی پرسی  جەنگی ڕووسیا  - ئۆکرانیا و ململانێی ئەمریکاو ڕوسیا و تورکیا - ئێران لە ناوچەکە و پرسی نەوت و غاز کە یەکێکە لە کارتە هەرە هەستیارەکان بەدەست ڕوسیاوە بۆ فشار خستنە سەر ئەوروپا ، بۆیە بۆ ئەوەی هەرێمی کوردستان خۆی لە فشارە ناوخۆیی و ناوچەیی و نێودەوڵەتیەکان بپارێزێ ، باشترین ڕێگا چارەی تەندروست مامەڵە کردن و هەماهەنگیە لەگەڵ وەزارەتی نەوت و سەمانە سروشتیەکانی عێراق بۆ ئەوەی بەدەردی ئۆکرانیا نەچێت و لە ئاگری جەنگێکی ناەرامبەردا نەسوتێ و بەدەردی ڕیفراندۆم و شانزەی ئۆکتۆبەر نەچێت کە نیوەی خاکی کوردستانیان لە شەو وڕۆژێکدا لە دەست دا ، ئەم جارەش ئەو نیوەیەی کوردستان کەماوە ئەوەش لە دەست بدەن !

سۆشیال میدیا

ڕۆژنامەی زەمەن