حكومه‌تی هه‌رێم له‌گه‌ڵ نوێنه‌ری وڵاتان كۆبوه‌وه: ئێمه پابه‌ندین به ڕێككه‌وتنه‌كه‌مان له‌گه‌ڵ حكومه‌تی فیدڕاڵی
02:16 - 30/05/2023
"زەمەن"
ژماره‌یه‌ك به‌رپرسی
حكومه‌تی هه‌رێم له‌گه‌ڵ كونسوڵ و نوێنه‌ری وڵاتان كۆبونه‌وه‌و پابه‌ندبوونی حكومه‌تی
هه‌رێمیان به‌ڕێككه‌وتنی نه‌وتی له‌گه‌ڵ حكومه‌تی فیدڕاڵ دووپاتكرده‌وه.
ئەمڕۆ هەریەک لە ئومێد سەباح،
سەرۆکی دیوانی ئەنجومەنی وەزیران و سەفین دزەیی، بەرپرسی فەرمانگەی پەیوەندییەکانی
دەرەوەی حکومەتی هەرێم و تریفە لە ئۆفیسی سەرۆکی حکومەت و جوتیار عادل وته‌بێژی
حكومه‌ت، لەگەڵ کونسوڵ و نوێنەری وڵاتان لە هەرێمی کوردستان كۆبونه‌وه.
جوتیار عادل، وتەبێژی
حکومەتی هەرێمی کوردستان لە کۆنگره‌یه‌كی رۆژنامەوانیدا رایگەیاند: ئومێد سەباح، سەرۆکی دیوانی ئەنجومەنی وەزیران
پوختەیەکی لەسەر گەڕی دانوستان و ئاڵنگارییەکانی سەبارەت بەو پێشهاتە سیاسییانەی
ئەمڕۆ لە گۆڕەپانی هەرێم و بەغدا لە ئارادان، خستەڕوو.
وته‌بێژی حكومه‌ت، ئاماژه‌ی
به‌وه‌كرد، لە کۆبوونەوەکەدا ڕوونکردنەوەی
پێویستیان لەسەر ڕێککەوتنی نێوان هەولێر و بەغدا و ئەو هەنگاوە نادەستوورییەی کە لە
لیژنەی داراییی ئەنجومەنی نوێنەرانی عێراقەوە نراوە، دایە ئامادەبووان.
وتی حکومەتی
هەرێمی کوردستان بەردەوام دەبێت لە گفتوگۆکان بۆ گەیشتن بە چارەسەری هەموو کێشەکان
لە چوارچێوەی دەستوور و وەرگرتنی مافە دەستوورییەکانی خەڵکی هەرێمی کوردستان.
جوتیار عادل، وتیشی جەختمان
کردەوە لەوەی، حکومەتی هەرێمی کوردستان پابەندە بەو رێککەوتنە سیاسییەی لەگەڵ
حکومەتی عێراق کردوویەتی، هەروەها بەردەوامیشە لە گفتوگۆ و دانوستان لەگەڵ حکومەتی
عێراق.
وتەبێژی حکومەی هەرێمی
کوردستان، ده‌ڵێت لەو بڕوایەداین، حکومەتی هەرێمی کوردستان و حکومەتی عێراق سوورن
لەسەر ئەوەی رێککەوتنی نێوانیان جێبەجێ بکرێت. حکومەتی هەرێم پێی وایە، بەهێزبوونی هەر یەکێک لە حکومەتی عێراق و
هەرێم بەهێزبوونی حکومەتەکەی دیکەیە.
وتیشی: دۆستەکانی هەرێمی
کوردستان بەردەوام لەگەڵ ئەوەدان دەستوور وەک خۆی جێبەجێ بکرێت، هەروەها لەگەڵ
ئەوەدان ئەو رێککەوتنەی لەنێوان هەرێم و بەغدا کراوە، وەک خۆی جێبەجێ بکرێت.