376وتار

چاكسازی "یار"ی وتارو نەیاری كردار

6/2/2020 4:28:00 PM

هەڵشۆ عەبدولفەتاح

چاكسازی یەكێكی تر لەو چەمكانەی لەهەرێمی كوردستان‌و لەدنیاش زۆرترین كات بەركاردێت‌و دەبێتە وێردی زمانی زۆرێك لەتاك‌و رێكخرا‌و گروپ بەتایبەتیش حزبی سیاسی‌و حكومەت زۆرترین كات بەكاردێنن، ئەگەر بگەرێتەوە بۆ خولی یەكەمی پەرلەمانی كوردستان لەساڵی 1992 لە وتاری یەكەم دانیشتنی پەرلەمانی كوردستان پرسی دروستكردنی دامەزراوە ئەنجامدانی چاكسازی چ وتراوە، سەرۆكی پەرلەمان لەو كاتەدا دەڵێت " بۆ ئەوەی چارەسەرێك بۆ ئەم برسییەتی‌و بێكاری‌و گرانییە بدۆزینەوە هەوڵبدەین كاروباری كشتوكاڵ وەگەڕ بخەینەوە بۆ ئەوەی لەكورترین كاتدا بتوانین پشت بەخۆمان ببەستین‌و ئیتر چاومان لەكۆمەكی دەرەوە نەبێت". ئەمە وتارێكە بیست‌و هەشت ساڵ پێش ئێستا لەهەرەمی پەرلەمانی كوردستان وتراوە، رەنگە بڵێن ئاساییە هەمان دەستەواژە (چاكسازی) ئێستاش بەشێوازی خۆی هەبێت‌و رابگەیەندرێت، چونكە دواجار راستە بەڵێ چاكسازی پرۆسەیەكی بەردەوامەو لەگەڵ ژیانی رۆژانەدایە، لەوانەیە ئەو چاكسازییەی ئێستا لەو خراپانەی ئێستادا بێت نەك هەمان خراپەكانی پێشوو بێت، بەڵام پرسیارە سەرەكییەكە ئەوەیە ئایا ئەو چاكسازییەی ئەو كات باسدەكرا ئێستا هەمان ئەو چاكسازییە نییە؟ ئایا ئێستا ناڵێن دامەزراوەكانمان لاوازن‌و پێویستە بەهێزییان بكەین؟ ئێستاش ناڵێن دەبێت پشت بەخۆمان ببەستین‌و كشتوكاڵ بكەینە سەرچاوەی داهاتی وڵات نەك چاومان لەهاوكاری‌و یارمەتی دەرەوە بێت؟ بێگومان جگە لەوەی بەشێك لە بكەری وتراوەكان گۆڕاون گەرنا شتێكی ئەوتۆ نەگۆڕاوەو ئێستاش هەمان وتارو هەمان ئەو هێزانەی ئەو کات بەرێژەی کەمتر لەگەڵ چەند هێزێکی تر بەرێژەی جیاواز هەر ئەو بانگەشەو بڵاوکراوانە هەیە.
ئێستاش وەك هەموو ئەوانی رابردوو لەحكومەت‌و پەرلەمان ئەمجارەش كەهەرسێ حزبی پێكهێنەرحكومەت (پارتی، یەكێتی،گۆڕان) بەكۆمەڵێك بانگەشەی قەبە قەبە پرسی چاكسازی راگەیەندراو بەڵێندرا چاكسازی جدی ئەنجامبدرێت‌و هەر باشی‌و خراپییەكی ئەم كابینەیەش دەكەوێتە سەرشانی ئەو سێ هێزە سیاسیە.
لەئێستادا ئەوەی دەیبینین لەپاش نۆ مانگ لەتەمەنی كابینەی نۆیەم لەوانەیە كارێكی واقعی‌و كاریگەری ئەوتۆ نەبینرابێت، هەرچەند ئەمە ناكەتە ئەوەی چەند هەنگاوێكی ئەم كابینەیە نادیدەبگرین لەوانەش یاسای چاكسازی‌و بڕیارەكانی ئەنجومەنی وەزیران كە لە كۆبونەوەی 5/5/2020 دەركراوە، بەڵام جاری تائێستاش ئەمانە هەر نوسراون‌و نەبونەتە كار لەبواری پراكتێكدا نە بینراون، بۆیە ئەوەی گرنگە ئەمانە قابیلی ئەوەیە پشتگیری لێبكرێت‌و هەوڵبدرێت ببێتە كارو بتوانرێت كاری باشتری بەدوادابێت، بەڵام دەبێت لەم پرۆسەیەدا كۆمەڵێك خاڵ رەچاو بکرێت ئەویش ئەوەیە پرۆسەی چاكسازی نە بەتەركی هەموان‌و هەر خۆم دەكرێت، نەبەوەش بەدێدێت كەلە دەستەڵات بم‌و گوتاری ئۆپۆزسیۆنم هەبێت، بەوەشناكرێت دەستەڵات لەوانی تر وەربگرمەوە بیخەمە دەستی خۆم‌و بڵێم چاكسازی دەكەم، بەڵكو پرۆسەی چاكسازی پێویستی بەوەیە بتوانێت دەنگە باش‌و چاكسازخوازەكان لەخۆت كۆبكەیتەوە تا بتوانێت پشتیوان‌و پشتگیری بۆ خۆت دروستبكەیت نەك بێت هەموان بكەیتە دژی خۆت، چونكە دواجار ئەم پەیام‌و سیاسیەتە هەرچەندە بەهێزو رەوا بێت تەنیا لەوتاردا "یار"ی دەبێت‌و لەكرداردا نەیاری زۆردەبێت.