شەهید؛ قوربانیی ئاوەزە بێدەنگەکەمان
1/12/2026 10:49:00 AM
یەڵدا هەرکی
کاتی ئەوە هاتووە
شەهید لە ناو ئێمەدا بمرێت؛ چونکە دووبارەکردنەوەی ڕۆژانەی مەرگ لەناو ژیانێکی چەقبەستوودا،
داستانێکی حەماسی نییە، بەڵکو تەنیا بەرگێکە بۆ داپۆشینی گەمژەیی و بێدەسەڵاتییە بەکۆمەڵەکەمان.
کاتێک مەرگ دەبێتە تاکە دەستکەوتی نەتەوەیەک، ئەوە نیشانەی زیندوویی نییە، بەڵکو نیشانەی
قبوڵکردنی فەنابوونە. ئەگەر شەهید لە خەیاڵدان و لە پیرۆزییە درۆینەکانماندا بمرێت،
ڕەنگە ویژدانی خەوتوومان بەئاگا بێتەوە؛ تا پێش ئەوەی وێنەی بێڕێزیکردن بە ژن و پیاوانمان
وەک بەڵگەی مەزڵومیەت بڵاو بکەینەوە، لە داخی بینینی ئەو سووکایەتییانە، لە ناوەوە
بمرین و ڕاپەڕین.
ژمارەی
شەهیدەکانمان لە درێژەی مێژوودا چیتر ئاسایی نییە. ئەم هەموو ڕووبارە خوێنەی ڕژاوە،
دەبوو نەک تەنیا نەتەوەیەک، بەڵکو جیهانێک ڕزگار بکات. بەڵام کێشەکە لێرەدایە: ئێمە
فێربووین خوێن بدەین بێ ئەوەی ئازادی وەربگرین. بێدەنگیی مێژووییمان لە ئاست کارەساتی
ئەنفال، بێحورمەتکردنی کەرامەتی مرۆڤەکانمان و دەستدرێژی بۆ سەر کچان و ژنان و تەنانەت
پیاوانمان، تەنیا نەهامەتی نییە؛ بەڵکو نیشانەی کڕنۆشبردنی ئێمەیە بۆ ئاوەزێکی بێغیرەت
کە مەرگی پێ لە ژیانێکی پڕ لە کەرامەت لا پیرۆزترە.
لە
کاتێکدا جیهان لە سەدەی بیست و یەکدا بەرەو لووتکەکانی زانست و مرۆڤایەتی هەنگاو دەنێت،
ئێمە هێشتا لەناو بازنە داخراوەکانی خوێنی سەدەکانی نۆزدە و بیستدا دەخولێینەوە. ئێمە
بووینەتە نەتەوەیەک کە تەنیا لە کاتی شیوەندا یەکدەگرین و لە کاتی ژیاندا لەبەر یەک
هەڵدەوەشێین.
ئەگەر
ئەمڕۆ باڵای ئەم "شەهیدە بەردەوامە" لە ناو خۆماندا نەبڕینەوە، مێژوومان
تەنها دەبێتە میراتێکی پڕ لە شەرمەزاری بۆ نەوەکانی داهاتوومان.