بۆچی ملیۆنان كەس دەنگیان بە ئەردۆغاندا؟

05:45 - 17/05/2023

"زەمەن"
قەیرانی دارایی و گەندەڵی و سەرك‌وتكاری هەبووە، ئازادی ڕادەبرین كۆتوبەند كراوە و بژێوی ژیان سەختر بووه، هەڵاوسان زۆربوە و لیرەی توركیا هاڕەی كردووە‌، دەنگی ئۆپۆزسیۆن كپكراوه، هەموو ئەمانە لە سەردەمی ئەردۆغاندا ڕوویانداوە، كە چاوەڕواندەكرا بەهۆیانەوە ڕەجەب تەیب ئەردۆغان لە دەسەڵات دووربخرێتەوە.
بەڵام بۆچی ئەردۆغان دەنگی ملیۆنان كەسی بەدەستهێناو ئەگەر زۆرە لە خولی دووەمدا ببێتەوە بە سەرۆك؟
یەكەم: بازنەی فراوانی بانگەشەی هەڵبژاردنەكەی، ئەردۆغان سەرۆكایەتی پارتی دادوگەشەپێدان دەكات، ژمارەی ئەندامەكانی دەگاتە ١١ ملیۆن كەس، كە لە هەموو حزبەكانی دیكە زیاترە.
دووەم: بەكارهێنانی دامودەزگاكانی دەوڵەت، حزبەكەی ئەردۆغان لە حزبی ئەكەپەوە گۆڕدراوە بۆ حزبی دەوڵەت، ئەندام و لایەنگرەكانی لە پۆستە فەرمیەكانی دادگا و راگەیاندندان، شارەوانی ناوچەكان موڵكی گشتیان خستوەتە خزمەتی ئەكەپەوە لە نمونەی ئوتوبوسەكانی بانگەشە، لەگەڵ ئەوەشدا بەرپرسانی حكومی پابەندكراون بە ئامادەبوونیان لە كۆبونەوە حزبیەكان. تەلەفزیۆنەكان زۆربەی كاتەكانیان بۆ ئەردۆغان تەرخانكردبوو.
سێیەم: كەسایەتی ئەردۆغان، كە لەلای هەوادارەكانی خاوەنی پێگەیەكی تایبەتە، پێشتر ڕێبەرایەتی توركیای كرد بۆ دەرچون لە قەیرانە قوڵەكان و كۆتایی بە هەیمەنی سوپا بەسەر دەوڵەتەوە هێنا.
چوارەم: پێگەی توركیا لە سەدەی ٢١دا؛ كە روانگەی توركیا بۆ سەدەی ٢١ لە خۆدەگرێت، كە ژمارەیەك بەرنامەیە و ئامانجەكەی پرۆژەی زەبەلاحە ئاراستەكردنی توركیا بەرەو داهاتوویەكی زێڕین، كە بەهۆیەوە پێگەی توركیا بۆ ئاستی وڵاتە زلهێزەكان بەرزبوەتەوە، ئەم ڕوانگەیە كاریگەری گەورەی لەسەر زیندوكردنەوەی هەستی نەتەوەچیەتی توركەكان هەبووە، لەگەڵ خەونی گێڕانەوەی ئیمپراتۆریەتی عوسمانی، ئەمەش وایكردووە هاوڵاتیانی ئەو وڵاتە چاو لە خراپی دۆخە ئابورییەكە و گەندەڵی دارایی دەوڵەت بپۆشن.
پێنجەم: بەكارهێنانی ئاین، بە هەمان ئەندازەی هەستی توركچیەتی، بەتایبەت لەو ناوچانەی خەڵكانی پاپەند بە دین و موحافیزكاریان تێدایە.