کەلتور

هەورێكی نەبان

06:47 - 30/10/2020 680 جار خوێندراوەتەوە

مارف عومەر گوڵ

بۆ ئەوێ‌  چووم  وامزانی
ئەستێرە لە مانگەشەویدا دەجریوێنێ‌
باران لە بەهاریدا تاوتاو خەفەت دەشواتەوە
هەتاو لە زستانیدا
دڵی ساردوسڕی دەرمەندە گەرم دەكاتەوە
شەماڵ لە هاوینیدا ،
بەسەر گڕەو هەڵقرچانا هەڵدەكات
ئەو شەوە درێژە كۆتایی نەهات
هەندێ‌ جار بەفر دایدەپۆشێ و ئەوین ڕەق دەبۆوە
هەندێ‌ جار دەنگی گۆرانی دەهات
هەندێ‌ جاریش گرمەی شەڕو وێرانكردن .
بۆ ئەوێ‌ چووم  وامزانی سابات و باغاتێكە
ترش و شیرین و مێخۆش ،
بە پاڵ درەختێكی ڕوتاوەوە گیرسامەوە ،
ئیتر سەردەمێكی ترە  دەوران
هەورازێكی ترە ڕێگە
پێچ و پەنایەكی ترە ژیان .
هەورێكی نەبان بەسەرمدا دەڕوا ،
بارانێكی ئاشنا دێتەخوارێ‌
تەونێكی هەڵگرتوە خەیاڵ
هەڵبەز و دابەزێتی ناچێتە ژێر ڕكێفەوە
كەوتۆتە هەردەو هەڵەت !
گلارەی دیدەم ئۆقرەی نەگرت
هەرداو هەردو دەشتاو دەشت
بە دوای خوڕەمی بارانەوە
لە تەپونمدا ون دەبێت !
ئەو هەورەش جێم دەهێڵێت ،ئای چی بكەم
چەخماخەو شریخەی دەمترسێنێت
لە دەشتێكا جێماوم ،
دڵم بەو ڕێگەیە خۆشە دەمباتەوە ئاوایی ،
وا دیارە بەم پایزی ژینەوە
گڵەبانی خانەی ئەوین هەر بە من ناكرێ‌ .
تۆ پڕیت لە دەرد و كوڵ
دەفتەرێكی سپیم بەرێ‌ ،پڕی دەكەم
لە خەمی دڵێكی سەركز ، لە نۆتەی هەور
بەسەر حیكایەتی ماتەمینیدا دەیگێڕم
دەری ماڵەكەمی پێ گۆرانی پژێن دەكەم
پرچی پەشۆكاوی تریفەی پێدەچنم
گەڵایەكی پێدەخوێنمەوە
ڕێحانەی حەیرانێكی ژێر كەپری ئەم مەرزوبوومە
بە لاپاڵی ژیانەوە ،
بەیتێك بۆ جەستەی نازداران دەخوێنێتەوە .

لەوێ‌ ، لەبەر شنەی حەیران و
لەبەر سەڵای بەیتی ،
شاخە و شاخ و شارە و شار  و
هەورا و هەور و دەورا و دەور و
گوندا و گوند و ماڵە و ماڵدا
چرپەی دێڕی ، منی بەیتان ، منی مەقامی گریان
منی ئاوازی لەبیر نەكراوی ساڵان
منی لاوكی شەپۆڕی دوێنێ و ئەمڕۆ
چرپەی دێڕی هەپرون بە هەپرونی جەستەی دێ‌
بۆ هەورێكی نەبان دەخوێنێت ،
دەڕوا و ناگەڕێتەوە
لەبەر ئاهونزولەی نەنە گەورەیەك
 لە بەهارە شیرینەكانی ئەم نیشتیمانە ناشیرین كراوەدا
نێرگس لە ئینجانەی دڵا سەوز دەبێتەوە .
ئەڵێی ئاوی ڕەوانە ، ئەوینە شاراوەكەی
تەمی نەبانی ڕۆژگاری هەور و هەتاو
ئەڵێی هەڵمەتی شەپۆلانە
لە سەردەمی قەڵاچۆكردنی ئینجانەی گوڵ و ڕێحانەدا
ئەڵێی گریانی خوێنە ،
لە سەدەی چەقۆ بەدەستەكانی نەوتا
ئەڵێی ( باخچەی پاشا )ی شیعرەكانی گۆرانە
لە سەردەمی وێرانە دا
ئەڵێی ( دڵی كوڕان و كچان )ی مەدهۆشە
لە خۆر نشینی دڵشكانا .

زستان پاڵتۆی سەرمای لە بەركردوە و
باران دەیشواتەوە ،
ئەستێرە لە باوەشی ساماڵدا تریقەی دێ و
مانگ بە سەربانی ماڵەكەی ئێمەوە
حیكایەتی شەوە سپیەكانی بۆ كچانی دەرو دراوسێ‌ گێڕایەوە
هەواڵی بەفری لەو شاخە پرسی ، بارانیش لە بنار
هەر هەور بوو ، دەهات و نەدەهات
تووڕە دەبوو ، هێور دەبۆوە
ئەو دەگریا و من دەگریام
هەر هەور بوو لە من دەچوو ، نیشتیمانی نەبوو
لە مەراقی چاوەڕوانیدا ون دەبوو !
هەر هەور بوو لە گوڵ دەچوو
ڕۆژێك هەبوو ڕۆژێك نەبوو
هەر هەور بوو لە خۆشەویستی دەچوو
لە هەڕەتی گوڕوتینا ئاوا دەبوو
لەم دەور و بەرە هەر هەور دەناسم
ئیتر هیچ بارانێك نەیدەزانی
لە باوەشی پان و پۆڕی ئاسماندا چی بەسەر هات
لە چ پەنایەكدا خۆی كۆدەكاتەوە
هیچ بارانێك نەیدەزانی هەور چی بەسەر هات
هەور نەهات ! دڵم سووتا
بووم بە یەكێك لە قوربانیەكانی قەدەر
ڕەشەبا پەلكێشی كردم ،
بۆ مەداری پەت پەتێنی ئەمسەر دونیا و ئەوسەر دونیا
لە چاوەڕوانیی هەوردا بووم ، پشتی لە زەوی كرد
لە چاوەڕوانیی نێرگسەجاڕێكدا بووم ، ڕۆچوو
لە چاوەڕوانیی ماچێكدا بووم ، هەڵوەری !
هەور نەهات ،
بە درەختێكی سووتاوەوە خۆم گرتەوە !

سلێمانی  / 3 - 4 /  2020  
نەبان : نادیدە ، نەناس ، كەسێك بە كەسێكی تر دەڵێت : بۆ خۆتمان لێ‌ نەبان دەكەیت .

سۆشیال میدیا

ڕۆژنامەی زەمەن

Advertisement