کوردستان

بریکارى وەزارەتى پەروەردە چارەنوسی خوێندنى ئەمساڵ ئاشکرا دەکات

02:17 - 09/01/2021 2698 جار خوێندراوەتەوە

زەمەن ــ ئامانج ئەحمەد

 

بریكاری وەزارەتی ‏پەروەردە رایگەیاند، دەرگاى قوتابخانە ئەهلییەکان ناکرێنەوە تا وەزارەت و لیژنەی باڵای کۆرۆنا بڕیاری لێ نەدات، جەختیکردەوە هەموو هەوڵێک دەدەن خوێندنى ئەمساڵ نەفەوتێت.‏

د.سەیوان عەلی، بریكاری وەزارەتی ‏پەروەردە بە"زەمەن"ی راگەیاند، بڕیارەكانیان بۆ راگرتنی خوێندن لەناو پۆل بەهۆی ‏كۆرۆناوە تایبەت نییە بۆ قوتابخانە حكومییەكان، بەڵكو سەرجەم ‏ناوەندەكانی خوێندنی حكومی ‌و ناحكومیی دەگرێتەوە.

سەبارەت بە دەستپێکردنەوەى دەوامى قوتابخانە ناحكومییەكان لە سبەى یەکشەممە وتى: "کەس بۆی نیە دەرگای قوتابخانە بکاتەوە هەتا وەزارەت و لیژنەی باڵای کۆرۆنا بڕیاری لێ نەدات".‏

لەبارەى چارەنوسی خوێندنى ئەمساڵەوە بریكاری وەزارەتی ‏پەروەردە ئاماژەى بەوەکرد، هەموو توانای خۆیان ‏خستووەتەکار بۆ ئەوەی ئەمساڵ بەكەمترین زیان خوێندن تەواو بكرێت بۆ ‏ئەوەش جگە لە رۆژانی هەینی تەنیا چوار رۆژ پشوویان هێشتووەتەوە، ئەوانیش یەك رۆژی نەورۆز ‌و 3 رۆژی جەژنی ‏رەمەزان پشوو دەبێت، ئیتر هیچ پشوویەكمان نەهێشتووەتەوە.‏

 

بەپێى ئامارەکانى وەزارەتى پەروەردە ملیۆنێک و زیاتر لە 700 هەزار خوێندکار لە هەرێمى کوردستاندا هەن، وتەبێژى حکومەت کۆتایی هەفتەى رابردوو ئاماژەى بەوەکرد، سەرەتای هەفتەی داهاتوو لیژنەی باڵای رووبەڕووبوونەوەی كۆرۆنا ‏جارێكی دیكە كۆببێتەوە بۆ بڕیاردان لەسەر چارەنووسی خوێندنی ئەمساڵ.

سۆشیال میدیا

ڕۆژنامەی زەمەن

Advertisement