رۆژی شەممە خۆڵبارینەكە دەگاتە هەرێمی کوردستان
01:13 - 14/05/2026
زەمەن - هەواڵ
کەشناسیی عێراق رایگەیاند سبەی هەینی عێراق
رووبەڕووی شەپۆلێکی خۆڵبارین دەبێتەوە کە لە هەندێک ناوچەدا چڕییەکەی زۆر دەبێت.
بەپێی راپۆرتی كەشناسی؛ ناوچەکانی رۆژئاوا، ناوەڕاست
و باشووری رۆژئاوای عێراق دەکەونە ژێر کاریگەریی ئەم شەپۆلە و چڕییەکەی لەنێوان
مامناوەند بۆ چڕ دەبێت.
دەستەی کەشناسیی عێراق داوا لە هاووڵاتییان، بەتایبەتی
شوفێرانی رێگاکانی دەرەوە و ئەوانەی نەخۆشیی رەبوو و هەستیارییان هەیە دەکات، رێکاری
پێویست بگرنەبەر و ئاگاداری کاریگەرییەکانی ئەم شەپۆلە بن.
لەلایەكی ترەوە كەشناسی هەرێمی کوردستان ئاشكرایكرد
كە ناوچەكەمان دەکەوێتە ژێر کاریگەریی بای رۆژئاوا و باشووری رۆژئاوای عێراق، کە لەگەڵ
خۆیدا تەپوتۆز هەڵدەگرێت. کاریگەرییەکەی زیاتر رۆژی شەممە و سەرەتای هەفتەی
داهاتوو لە هەرێمی کوردستان دەردەکەوێت، بەتایبەتی لە ناوچەکانی گەرمیان و کەرکووک."