هەواڵ

بڕیارێکی حکومەت کاردانەوەی لێدەکەوێتەوە

06:51 - 15/07/2019 2155 جار خوێندراوەتەوە

"زەمەن"


بڕیارێکی حکومەت لە بارەی فەرمانبەران کە دەبێت پابەند بن بە پاراستنی نهێنی کاروباری فەرمانبەرییەتی و نابێت ئەو زانیارییانەی کە بە نهێنی پۆلێن دەکرێن ئاشکرا بکرێن، کاردانەوەی لێدەکەویتەوە.

 

ئەمڕۆ دوو شەممە، ١٥ى تەموزى ٢٠١٩، ئەنجومەنی وەزیران یەکەم کۆبوونەوەی خۆی ئەنجامدا و تیایدا چەند بڕیارێکی دەرکرد و یەکێک لە بڕیارەکانیش تایبەت بوو بە فەرمانبەران کە نابێت ئەو زانیارییانەی کە بە نهێنی پۆلێن دەکرێن لە دەرەوەی رێکارە یاساییەکان ئاشکرا بکرێن.

 


رەحمان غەریب، لە سەنتەری میترۆ، بە دیجیتاڵ میدیای "زەمەن"ی راگەیاند: "ئەو بڕگەیە ئەگەر وەک یاسای فەرمانبەران سەیر بکرێت کە دەبێت هەموو کەسێک نهێنی شوێنی کارەکەی بپارێزێت، ئەوا هیچ گرفتێکی نییە، بەڵام هیوادارین تەفسیری ئەو بڕگەیە وانەکرێت کە هەموو زانیارییەک دەبێت نهێنی بێت و هەر زانیارییەک بڵاوبکرێتەوە فەرمانبەر سزا بدرێت".

 

 

وتیشی: سەرۆکی حکومەتی هەرێم شەڕی گەندەڵی راگەیاندووە، ئەم شەڕە بەوە دەکرێت کە حکومەت شەفافتر بێت و زانیاری زیاتر بدات بە هاوڵاتیان لە رێگەی رۆژنامەنوسانەوە.

 

هاوکات مەم بورهان، ئەندامانی لیژنه‌ی ڕۆشنبیری و کۆمەڵگەی مەدەنی و وه‌رزش و لاوان لە پەرلەمانی کوردستان رایگەیاند: "پاراستنی نهێنیی كار، بەرپرسیارێتیی ئەخلاقییە، بەڵام ئەم بەرپرسیارێتییە تا ئەو شوێنە راستە، كە پاراستنی نهێنییەكە، هەڕەشە نەبێت بۆ سەر بەرژەوەندیی گشتیی و دژی پرەنسیپەكانی شەفافییەت و دیموكراسیی نەبێت".

 

 

دەشڵێت: "نابێت ئەم بڕیارە دژی بەند و پرەنسیپەكانی "یاسای مافی دەسكەوتنی زانیاریی لە هەرێمی كوردستان- عیراق" بێت، كە یاسای ژمارە (11)ی ساڵی 2013یە و هێشتا نەخراوەتە بواری جێبەجێكردنەوە".

 

مەم بورهان، ئاماژەی بەوەشکردووە، پێویستە پاراستنی نهێنیی كاروباری فەرمانبەرییەتی، لەپێناو بەرژەوەندیی گشتیی و پیرۆزیی كاری فەرمانبەرێتیی دا بێت، نەك دروستكردنی حكومڕانییەكی پۆلیسیی، كە دامەزراوەكانی حكومەت، بەڕووی میدیا و هاونیشتمانیاندا داخراوبن و دژی سادەترین پرەنسیپی شەفافییەت بێت.

سۆشیال میدیا

ڕۆژنامەی زەمەن