هەواڵ

شەو، لەدەستم بەربوەوە

05:13 - 12/05/2019 27 جار خوێندراوەتەوە

"زەمەن"

 

عەلی پێنجوێنی


تەڕی شەو، بەگوڵە شیلانەكانەوە دەبریسكایەوە
بن درەختەكانیشی پڕ دەكرد، لەنەشئەی تاریكی
گڵمتكی گڵم دەبینی، چاوی بەنوری شەو دەڕشت
حیكایەتی، ئەو تاریكیانەی وەك تەڵا ئەدرەوشێنەوە
هەردەبێت لەگڵی ببیستین
گوڵبژێری ئەو گوڵە زەڕاتانەم دەكرد
كەشەویان پیادا، رژابوو
بەڕۆنی ئەو گوڵە زەڕاتانە، سەر دڵم ئەشێلا
تابەرگەی ئافاتی چاوەڕوانی بگرم
دەمێكە كزەی – با- بەگیانما دەزولە ناكات
ئەگەر كردبێتیشی هەستم پێنەكردووە..
دەستم لەوە شتبوو-با- دەسگیر بكەم
تەڕییەك ڕژا بەدەستما وەك موروی شەوە دەبریسكایەوە
تمەز – با- بەجێدێڵێت و دەڕوات
هەڵدێت و ڕوو بەو دۆڵە مل دەنێت
دۆڵێك ئەستێرەكان
هەم خۆیانی تیادا دەشارنەوە هەم خۆیانی تێدا دەشۆن
دۆڵێك چراخانە لەنوری تاریكی
دۆڵێك لیپاو لیپە لەتەڕی شەو
چنگ لەسەر شان و تلاو تل
رۆشت بۆ ئەو دۆڵە دڵم
كێ‌ دەڵێ لەم كەوتنە خوارەوەیەمدا
چڵێ لەشەو نەبوایەو خۆمم پێنەگرتایەتەوە
هەرچی گیانمە نەدەبوو بەخەستەكی كەوە...
تاقوڵتر چاوبنێت بەیەكداخێراترو دڵبەستر
دەگەیت بەو كێڵگانەی تەنها تەڕی شەو
ئەتوانێت ‌تێراویان بكات
لەمناڵییەوە ئولفەتێكی ترسناك و شاراوەم هەیە
شاردنەوەی دەستەكانمە لەخەڵكی
قەینا ئەوا وتمان دڵم كەس نایبینێ و تەنیا خۆم و خوا دەزانین
لەكەیەوە تاریكی پیاڕژاوەو شڵپەی دێت لەبێ تۆیی
ئاخر تاكەی دەتوانم ئەو هەموو شەوە بشارمەوە
كەبەدەستمەوە دەڕژێت، كە لەدەستمەوە دەڕژێت؟
بیرم نایەت لەكەیەوە ئاو دەكەینە بن دارەكان؟
رۆژمان لەدەستی خوا بڕی بۆ ئاواشتنی باخەكان
نەشكۆفەی گوڵێكمان دی نەگۆپكەی درەختێك تەقی
تەنیا ئەوكاتانە نەبێت،كەڵەشێرەكان بەدەنوك
درزیان دەكردە، شیفۆنی شەوەوە
ئەو دەمانە شكۆفەوگۆپكەی تەقیومان دەبینی
ئاخر ناو سینەی باخەكان بەتاریكی تێرئاو دەبوون
كەواتە تەجەللای تاریكی نەبێت
رۆحی هیچ درەختێك كەسك ناچێتەوە
ئەوەتەی دونیا هەیە
ئاو بەڕێگەوەیەو لەبەر پێی قاچوقولی خۆیداچەم دروست دەكات
كێ چەمی دیوە، كە پەركەم دەیگرێت؟
من بینیومە ، كەفی زیوین ئەچەڕێنێ‌
مەحشەری جوانی ئەم كەفە ، هەر لەشەودا دەبینرێت
ئاخر گوێلێ‌ تاریكی نەچۆڕێنیتە، قوڕگی چەمەوە
نەچەم پەركەم دەیگرێت و نەچەم كەفی زیوین ئەچەرێنێ
با دەسكاری ستاتیكا بكەین
بادەست وەردەینە ڕوانینەوە
ئاخر بەڕۆحتا هەڵنەزنێیت
شەو چۆن بەدەستەوە دەڕژێت؟
تاریكی چۆن لەپەنجەكانتەوە ئەتكێت؟
بادەست وەردەینە روانینمانەوە
ئەگەر وانەكەین تامردن
ئاو نابینین لەكاتی پەڕینەوەدا
دەستی گەڵایەك بگرێت و بیپەڕێنێتە ئەوبەرەوە
بێ ئەوەی بهێڵێت، كیسەڵی بن ئاوەكە
داچڵەكێن و خەبەری بێتەوە
روانینت بەنوری تاریكی نەشۆییت
چۆن قرژاڵ دەبینیت توشی نەزیفی جوانی دەبێت و
قومێك ئاو بەدڵۆپێك شەو دەگرێتەوەو هەڵیئەچۆڕێتە قوڕگییەوە؟
تاریكی دەستی درەخت نەگرێت تادەگاتە كانیەكە
لەسەت لاوە گیانی ئەشكێت
تەڕایی شەو خۆی رانەخات بۆ كرمەكان
ناگەنەوە بەدایكیان و لەچاوەڕوانیدا كوێراییان دادێت
من بینیومە تاریكی خۆی كردووە بەپەیكەر
تاپشیلەیەكی تازە زاو
بەچكەكانی روو بەشوێنێكی ئەرخەیان گواستۆتەوە
بادەست وەردەینە ڕوانینمان
دەسكاری هەموو شتێكمان كرد، ژەنگی ڕوانینمان نەبێت
ئەستێرەمان لەئاو كرد،ئەگەر تەڕیی شەو نەبوایە
ئێستە هەرچی ئەستێرە هەیە،لەتینوانا هەڵوەریبون
زاڵمی ئینسان نەبێت

ئاو یخ ئەدرێت و لەتاقیگەدا ، ئەدڵۆپێنرێت..؟
دواییش لەهەموو شتێك ئەچێت ، لەئاو نەبێت..
توێژاڵی تەڕیی شەو،لەباڵی مێش تەنكترە
لەدڵی سۆفییەكی تاریكنشین ، تەڕترو میهرەبانترە..
ئەگەر وانییە، چۆن بەدەنگی هەنسكی پیاوێكی تەنیا
ئاوا پەراش پەراش دەبێت و لەدەستی منەوە دەڕژێت؟
هەرچی تەڕایی هەیە ڕەنگتان كرد، بەڕەنگی درۆ
بەتەڕایی گریانیشەوە
بەس نەبوو نوری تەجەللای تاریكی هەبوو
بەس نەبوو ، عیشوەی ئەو هەموو جوانییە هەبوو
كەلە بۆڵە ترێی شەو، دەتكا، ئەگەر وانەبوایە، دەمێك بوو
گورگان خواردووی بادەیەك دەبووین..
هەموو شتێك دەبوو، جگە لەشەراب
كەلەدەستم بەربووەوە، بەوەی باش بوو
بەدیوی دڵما،كەوتە خوارەوە، ئەگەر وانەبوایە
كێ باوەڕی پێدەكردم بموتایە
ئەوە شەو بوو لەدەستم بەربووەوە....
دەستكاری هەموو شتێكمان كرد، بەخراپترین شێوە
ئەو كێڵگە دورانەی لەنووی شەو، ئاویان دەخواردەوە
كەمەنكێشی ناو سەتڵە نایلۆنەكانمان كردن...
بەدیاری بۆ یەكترمان دەبردو پینەی درۆكانمان پێدەكرد..
هەڵاڵە برایمە و مێلاقە بە قۆڵبەستراوی لەوشاخانەوە
بەدیلی هێناماننەوەو پەلكێشی ناو تاقیگەكانمان كردن
تەڕایی بڕمان كردن ، لەشەو
ماڵەكانیشمان پڕكرد لە گوڵی پلاستیكی و شەڕی هەرگیز نەبڕاوە
دەسكاری هەموو شتێكان كرد
كەچی نەمانتوانی برینێكی شەو ببینین و بپرسین
ئەرێ بێداران بۆ لەگریانی شەو نابنەوە.
بادەست وەردەینە ڕوانینمان
كونوكە لەبەری بنی زەریاكانمان تەی كرد، هەموو شتێكان دۆزییەوە
تەنها بینینی ڕاستەقینە نەبێت
زۆر دوور نەبوو هەر لەیەكەم توێژی ئاو ئاودابوو
بینینمان بدۆزیایەتەوە تێدەگەیشتین
مێشهەنگ چۆن لەسەر توێژی ئاو دەخەوێت بەبێ ئەوەی بخنكێ؟
ئەو تەڕیی شەو ، نەشئەی زیاتر ئەدات بەباڵەكانی ، نەك هەر بۆ فڕین
بۆ تەكاندنی ئەو هەموو تاریكییە
بۆیە دەریا لەتاریكیدا بەنوری تاریكی ئەبریسكێتەوە..
كەنەزانی سنەوبەر حونجە بكەیت و تێنەگەیت بۆچی
كەیفی بەشوێنی دوورە مرۆڤ دێت؟
چۆن تێدەگەیت و دەتوانیت باخ بخەیتە ڕستەوە؟
دەسكاری زۆر شتمان كرد..
خوێنمان لەتاقیگەكاندا بەجێهێشت،كەچی ڕەشەبای خوێنمان نەدەبینی
چۆن لەناو خوێندا هەڵدەكات..
چاومان برد بۆ بیمارستان، سۆمای بۆ بگەڕێتەوە
ئەدی رۆح ببەین بۆ كوێ‌؟
بادەست وەردەینە ڕوانینمان
ئاو لەشەو هەڵكێشە، بۆ هەمیشە بۆچوونت لەسەر ڕەنگی ئاو دەگۆڕێت
كات لەشەو هەڵكێشە،بۆ نوونە نیوەڕۆ
بۆهەتاهەتایە لەكاتی ئاساییدا سەیری سەمای ئاگر ناكەیت..
ئاگر بەرەوە، ناو شەو بۆیەكەمجار لەنجەولاری گڕ ئەبینیت
وەختێ لەناو تاریكییدا دەڕەقسێت..
وادەزانن ئێوارە هەر وا جوانە، كەهەتاوی ئاوابوون قرچەقرچ ئەیسووتێنێ؟
دەست وەربدەرە ڕوانینت
ئێوارە هەڵكێشە، لەشەو دەبینیت چۆن تاریكی
قوم قوم نور دەكات بەدەمی ئێوارەوە
ئاوا نەكەیت ژیان نابینیت، كەچۆن
لەناو عەمزەی جوانیدا نغرۆ ئەبێت؟
جارێك دایكم بینی، خۆی لەتەڕی هەرێزەكە هەڵژەندو وتی:
ئیلاهی تۆ ئاگات لێیە، دەستنوێژ بەتەڕایی ئەم هەرێزە هەڵدەگرم
ئەزانی بۆ؟ ئەمە رۆحی تۆیە بەسەر ئەم چیمەنەوە نمە ئەكات
نەموێرا بەدایكم بڵێم
ئەوە شەوە تەڕ ئەچێتەوەبەسەر ئەم هەرێزەوە
لەو تڵوعی فەجرەوە
رۆحی خودا و تەڕایی شەوم بۆ لەیەكتر جیاناكرێتەوە؟


سۆشیال میدیا

ڕۆژنامەی زەمەن