هەواڵ

(جواب بۆ جەناب)

09:37 - 11/05/2019 99 جار خوێندراوەتەوە

"زەمەن"

(کامەران سوبحان دەینووسێت)

 

*هەست ناکەیت ئەوەی دەیڵێیت خۆ دزینەوەیە لە مانای شیعرو نەمریی شیعر؟

- نەخێر. لە کوێدا خۆمم شاردووەتەوە. چ شیعرێ نەمرەو چ شیعرێ مردووە؟ شاعیر خۆی چۆن لە شیعری مردوو رزگار کات؟ (وەڵامێکی دامەوە، پرسیارو گومانی خستە سەر دێڕی پرسیارەکانم و کەمێ نیگەرانیش بە رووخسارو شێوەی وەڵامدانەوەکەیەوە دیار بوو.!)

 

*مامۆستا شیعری نەمر ئەو شیعرەیە خەیاڵسازەو لە ئایدۆلۆژیاو بۆنەی تایبەت، گەورەترە. هەندێ شیعریشت لە بۆنەی تایبەتیی نووسیوە، بەڵام خەیاڵی قووڵی تێدایە.

نەمرە، هەموو سەردەمێ دەخوێنرێتەوە. وەک شیعری: (جواب بۆ جەناب، هاوڕێم بێکەس، لە سەرەمەرگی هیوادا، شیوەنی گوڵاڵە) لە شیعری “جواب بۆ جەناب”دا، وەڵامی شێخ نووری شێخ ساڵح دەدەیتەوە، کە شیعرێکی بەناوی جەنابی کووڕییەوە، لە رۆژنامەی ژین بڵاوکردووەتەوە:

جواب بۆ جەناب

ئەی (ژیان) پاش شکایەتی دووری

ماچ کە چاوی جەنابی شێخ نووری!

ماچ کە چاوی بە تاسەوە، کە جەناب

دەرسی ئەوەڵ گەیشتە خەتمی کیتاب!

ڕستە شیعری ڕەواج و قیمەتدار

باوکی تۆ بوو، بنێری بۆ بازاڕ

ڕاستە ئێستەش بە دۆسیە و دەفتەر

داخراوە لە مێشکی شەش دەر

لاکین ئاخۆ چ شاعیرێکی تر

شیعرە پیشەی بە دائیمی، سەرومڕ؟

باوکتە، تۆی، منم، ئەمە یا ئەو

ھەوڵی نانە بە ڕۆژ و، شیعرە بە شەو

ئەم شیعرە شیعری بۆنەیەو دەمێنێتەوە، بەڵام شیعری (بت، بتەوان) شیعرێکی ئایدۆلۆژییەو نامێنێتەوە لای خوێنەر.! -

من وای نابینم. لێکچوون و جیاوازیش زۆرە لەنێوان ئەو دوو شیعرەی تۆ باستکردووە. (بت بتەوان) لە زیندان نووسیومە.

(جواب بۆ جەناب) گفتوگۆو وروژاندنی پرسیارە لە شیعردا لەسەر یەکێ لە شاعیرە گەورەکان، کە شێخ نووری شیخ ساڵح”ە. لەو ڕۆژگارەدا کە ئەم شیعرەم نووسی، دڵنیا نەبووم شیعرێکی بە مانا شیعرو دەمێنێتەوەو پاش مردنیشم تۆ لە کون و قوژبنێکدا دەیدۆزیتەوەو دێیت گفتوگۆی دێڕو وشەو تەکنیکەکەیم لەگەڵ دەکەیت.

(مامۆستا گۆران وا باسی شیعرەکەی (جواب بۆ جەناب)ی بۆ کردم.!

 

* ئەو ئێوارەیەی پاش پێشوازییە گەرمەکەی خەڵکی سلێمانی، لە ئازادکردنی ئێوەدا لە زیندانی بەعقووبە (بەهادین نووری و عومەر عەلی شێخ) لە باڵکۆنەکەی ئوتێل (شەمێران) هەریەکەیان وتارێکی پڕ جۆش و خرۆشی ئایدۆلۆژییانەیان خوێندەوە. پاش ئەوان، کە وتیان گۆران شیعر دەخوێنێتەوە، خەڵکەکە هەمووی بێدەنگ بوون و گوێیان بۆ شیعری تۆ رادێرا.

دەستتکرد بە خوێندنەوەی شیعرە درێژەکەت (بت بتەوان) سەرەتا کەمێ بێدەنگ بوویت و یەک یەک لاپەڕەکانت هەڵدایەوە، بۆ ئەوەی دەست بە خوێندنەوەی شیعرەکەت بکەیت:

بت، بتەوان

ڕابووردوو:

ھەبوو، نەبوو

سەردەمی زوو

بت، بتەوان

پیرە شەیتان

بت دروستکەر

بتەوان گۆشدەر

بتپەرستی بە ئایینکەر

ڕەگ داکەوتووی ئیمپریالیست

خوێنمژی ئاسایش نەویست!

بت، بتەوان

پیرە شەیتان

 

*ئەم کۆپلەی یەکەمت خوێندەوە، من نیگەران بووم، شاعیرێکی مەزنی وەک جەنابتان، وشەو دێڕە جوانەکانی بە ئاوی ئایدۆلۆژیی گەورە بکات.! لەوەش نیگەرانتر، پاش نیو سەدە، لەناو دیوانە شیعرییەکەتدا کۆمەڵەی پێنجەمی شیعرەکانت بەناوی (لە کۆڕی خەباتا) زیاتر لە بیست شیعرە لەوانە (مۆسکۆی جوان، ڕێگای لینین، شۆڕشگێڕ، بۆ مایکڵ... هتد) هەمووی وەک ئەم شیعرە، ئاخنراوە بە دێڕو وشەی ئایدۆلۆژیی و چینایەتیی.

لای من شیعر پایەی مانەوەی کوولتووریی مرۆڤایەتییە، نابێ باربکرێ بە ئایدۆلۆژیی چینایەتیی.! (نیگەرانیی گۆران، لە چاوەکانیدا تا بێ زیاتر دەبوو.

هەستمکرد دەیەوێ پێم بڵێ تکایە لەوە زیاتر سنووری خۆت مەبەزێنە.! هیچی نەووت و کەمێ بێدەنگ بوو) *(دیوانە شیعرییەکانم زۆرن. گوڵی رەنگاوڕەنگن، لەناو ئەو گوڵانەشدا دەکرێ جارجار دڕکێ، یان گوڵێکی بێ بۆن سەوز بێ.!) وا وەڵامی قسەکانی دامەوە. -

ئەی شەوقی گەلاوێژ:

ئەی شەوقی گەلاوێژ بەیان نوری نیگاهت

ئەی عەتر سەبا بۆی نەفەسی زوڵفی سیاهت

ئەی حوسنی تولوع وێنەیەکی فەیزی حوزورت

ئەی حوزنی غورووب، ڕۆژی ڕەشی دووری تەباهت!

ئەم شیعرە یەکێکە لەو غەزەلانەی کە نووسیومە، لەناو ئەو شیعرانەی کە بە شێوە شیعری قوتابخانەی شیعریی بابان ناویان دەبەن، کە لەڕاستیدا من پێم وایە قوتابخانەی شیعری سلێمانییەو پێش دروستبوونی شاری سلێمانیی هیچ کام لەو شاعیرانە شیعریان بەم ئاستە قووڵە نەبووە.! ناکرێ لەبری گفتوگۆکردن و جۆرێ لە دادگاییکردنی شیعرەکانم، باسی غەزەلیاتی شیعرەکانم بکەین، کە لە کۆمەڵە شیعری بەهەشت و یادگار)دا، کە چەندین شیعری تیدا بڵاوبووەتەوە؟ (مامۆستا گۆران وای پێووتم)

*ویستم پرسیار لەسەر غەزەلیات و هەندێ لەو شیعرانەی کۆمەڵە شیعری (بەهەشت و یادگار) لێبکەم، گۆشەکەم دەرفەتی نەدا، هەفتەی داهاتوو، باس لە بەهەشت و یادگار و غەزەلیاتی گۆران دەکەیت.

سۆشیال میدیا

ڕۆژنامەی زەمەن