کوردستان

بیانویەكی دیكە بۆ دواخستنی دادگایكردنی مامۆستا بەدەل بەرواری و ئومێد بەرۆشكی هێنرایەوە

10:24 - 15/09/2021 166 جار خوێندراوەتەوە

زەمەن_هەولێر

هەرچەندە بڕیاربوو ئەمڕۆ دادگاییکردنی مامۆستا بەدەل بەرواری و ئومێد بەرۆشکی بەڕێوەبچێت، بەڵام جارێكی دیكە دادگاییكردنیان دواخرا.

 

بەشدار حەسەن، پارێزەری خۆبەخشی دەستگیركراوانی بادینان، بە "زەمەن"ی رایگەیاند: بە بیانوی ئەوەی دادوەرێكی دادگای دووی تاوانەكانی هەولێر مۆڵەت بووە دادگاییەكەی دواخرا بۆ 12ی ئۆكتۆبەری داهاتوو.

بەشدار حەسەن، وتیشی"ئەو دادوەرە یەدەگەی بۆ جێگرتنەوەی دادوەرەكە دیاریكرابوو، وتی من دۆسیەم نەخوێندوەتەوە و شارەزایم لەسەر نیە".

ئەو پارێزەرە جەختیكردەوە كە دواخستنەكە سیاسیە و هەر جارێك رۆژی دادگاییكردنی چالاكوانانی بادینان دیاریبكرێت، ئەوا دادوەرێك مۆڵەت دەدرێت.

رۆژی ١١ی مانگی رابردوو، بە بریاری سەرۆکی دادگای تاوانی دوی هەولێر، دادگاییکردنی مامۆستا بەدەل بەرواری و رۆژنامەنوس ئومێد بەرۆشکی لە ۳٠/۹/۲٠۲۱ پێشخرا بۆ ۱٥/۹/۲٠۲۱.

رۆژی ٢٧ی تەمموز، دانیشتنی دادگایی کردنی بەدەل بەرواری و چالاکوانێکی دیکەی دەستگیرکراوی بادینان لە دادگای ھەولێر دواخرا و لەدوای بڕیاری دواخستنەکەش بەشدار حەسەن پارێزەری خۆبەخشی دەستگیركراوانی بادینان، رایگەیاند، "ھیچ بەڵگەیەکی یاسایی نیە بەدەل بەرواری و ئومێد بەرۆشکی تاوانبار بکات" ڕۆژی ١٩-٨-٢٠٢٠، مامۆستا بەدەل بەرواری و رۆژنامەنوس ئومێد بەرۆشکی بەتۆمەتی هاندانی خەڵک بۆ خۆپیشاندان لەدهۆک دەستگیرکران، تا ئێستا دادگاینەكراون.
 

سۆشیال میدیا

ڕۆژنامەی زەمەن

Advertisement