کەلتور

لە ئێستادا بیری کەس ناکەم

12:22 - 19/04/2021 482 جار خوێندراوەتەوە

حسەین لەتیف

هەرکاتێ  بیری ئەوانی ترم کردبێت  /  بە شێوەیەکی نائاسایی کێشم  زیادی کردووە./کاتێک هەیە تیایدا بیری کەس ناکەم /
 وەکو ئێستا، کە بیری کەس ناکەم/
هەرکاتێک بیری ئەوانم کردووە  /
گرانترین شتی خۆم لەدەستداوە /
گرانترینی من، بۆ نموونە (هێزی فڕین).
بیرکردنی ئەوانی تر  / واتە بەستنی کەسێکی تر بە خۆتەوە / واتە بەستنی خۆت بە ئەوی ترەوە / واتە تێکچوونی فیزیای تۆ  / لە دۆخی فڕینەوە بۆ دۆخی  بەرد. /ڕۆژانە هەزاران جاربووم  بە بەرد/.
بێزارم لە هەموو ئەوانەی ڕۆژێک لە ڕۆژان بیرمکردوون / ئەوان بوون بەهۆی  زۆر مانەوەم لێرە/ ئەوان هەموو خۆشیەکانیان   بۆ خۆیان برد  و بە منیان ووت: (مەبە بە نێچری غەمگینی)*.
بەشی من  لە ژیان /منی شکست خواردوو لە جەنگی دیاریکردنی  چارەنووسمدا/ ئەوەندە بوو ،  ئەو قەرەباڵغیەی قووتیدام.
*
ئای تەنیایی / چ ڕۆژانێکی زوو تێپەڕبوویت؟
/ چەند شەرابێکی بە چێژبوویت!
تازە تۆم ڕژێنرا!
ئەوەتا دەیبینم ،دانەکانیم لێ ڕیچ دەکاتەوە / ئەوەتا خۆیەتی ،  دەزانم ،ژیان هاتووە سزام بدات /
وەک ئەو شاعیرانەی سزا دران  بە خۆکووشتن /
 دەزانم ،سزا دەدرێم ،  بە قەرەباڵغی!

*دێڕێکی ڕامبۆیە، لەنامەیەکیدا بۆ دایکی نووسیبووی( مەبە بە نێچێری دڵتەنگی).

سۆشیال میدیا

ڕۆژنامەی زەمەن

Advertisement