کوردستان

ئه‌و كه‌سانه‌ی هێرشیانكرده‌ سه‌ر چێشتخانه‌كه‌ی سلێمانی ده‌ستگیركران

07:18 - 22/11/2020 670 جار خوێندراوەتەوە

"زەمەن"

 

ئه‌و چه‌كدارانه‌ ده‌ستگیركران كه‌ پاش نیوه‌ڕۆی ئه‌مرۆ یه‌كشه‌ممه‌، به‌ جلی ئه‌منی و مه‌ده‌نییه‌وه‌ هێرشیانكرده‌ سه‌ر چێشتخانه‌ی كامه‌ران له‌ گه‌ڕه‌كی عه‌قاری شاری‌ سلێمانی.

 

 سه‌ركه‌وت ئه‌حمه‌د، وته‌بێژی پۆلیسی سلێمانی، به‌ "زه‌مه‌ن"ی وت: ئه‌و كه‌سانه‌ی چوونه‌ته‌ سه‌ر چێشتخانه‌كه‌ ده‌ستگیركران.

 

له‌ باره‌ی ئه‌وه‌ی ئایا هێزی ره‌سمی بوون، سه‌ركه‌وت ئه‌حمه‌د، وتی: هه‌ر هێزێك بووبن به‌بێ فه‌رمانی دادوه‌ر ئه‌و كاره‌یان كردووه‌، بۆیه‌ ده‌ستگیركراون.

 

به‌پێی به‌دواداچونه‌كانی "زه‌مه‌ن" و لێدوانی لایه‌نی په‌یوه‌ندیدار، ئه‌م بابه‌ته‌ په‌یوه‌ندی به‌ كێشه‌ی نێوان خاوه‌ن موڵك و كرێچیه‌كه‌وه‌ هه‌یه‌ كه‌ خاوه‌نی چێشتخانه‌ی كامه‌رانه‌.

له‌ كۆنگره‌یه‌كی رۆژنامه‌وانیدا كه‌ په‌یامنێری "زه‌مه‌ن"ئاماده‌یی بوو، خاوەنی چێشتخانەکە وەستا کامەران وتی "نازانم ئەو هێزە سەر بە چ لایەنێکن، لەسەر چ ئەساسێک ئاوایان لە ئێمە کردووە، بۆیە ئێمە قبوڵی ناکەین. من کاسبم و دەبێت بۆم روونبکەنەوە ئەوان بۆ وایان لە من کردووە. بە چەکیش میلییان لێهێنامەوە و پێیانگوتم کە ئەم عەسرە دەتانکوژین، بزانم بۆ دەمانکوژن؟ شاری بێ ساحێبە ئێرە؟ ئەوە زۆر ناخۆشە و ئەگەر خۆیان پێ یەکێتییە، منیش یەکێتیم".

 

خاوەنی چێشتخانەکە لەسەر رووداوەکە و هێرشکردنە سەریان دەڵێت: "سکاڵامان تۆمارکردووە و برایه‌كمیان بە تفەنگ بریندار کردووە، كه‌سێكی دیکەش برینداربووە".

 

وەستا کامەران دەڵێت: "من هەشت ساڵ بوو کرێچی بووم لەم دوکانەدا و لەڕێگەی یاساییەوە لە رۆژی پێنجشەممەوە شوێنەکەم بۆ چۆڵکردوون. بەڵام رۆژێک ئاویان لێگرتمەوە و دواتر شکاتم لێکردن و لە شکاتەکەیشم پەشیمان بوومەوە. بەڵام نازانم ئەمڕۆ بۆ وایان لەمن کرد".

 

له‌به‌رامبه‌ردا هه‌ر لە کۆنگرەیەکی رۆژنامەوانیدا، زانا کەمال حەکیم ئاغا، کە کێشەیان لەگەڵ وەستا کامەراندا هەیە رایگەیاند: "کێشەکە کێشەیەکی بچووکە و کاک کامەران ماوەیەکی زۆرە کرێچی ئێمەیە، ئەو کوڕەی ئێمەش ماوەیەکی زۆرە پێیگووتوە کە دەبێت ئەو شوێنە چۆڵبکەی، هەروەها زیاتر لە حەوت مانگ کرێی نەداوە و داوای پارەیشی کردووە. بەڵام کاک هیوا کە خاوەنی موڵکەکەیە پارەکەی پێداوە. ئەوەی کە کێشەکەی دروستکردووە ئەوەیە کە وەستا کامەران شوێنەکەی داڕماندووە".


له‌م دوو كۆنگره‌ رۆژنامه‌وانیه‌دا كه‌ په‌یامنێری "زه‌مه‌ن" ئاماده‌بوو، هه‌ردوو لایه‌نی كێشه‌كه‌ قسه‌ له‌سه‌ر رووداوه‌كه‌ ده‌كه‌ن.

 

 

سۆشیال میدیا

ڕۆژنامەی زەمەن

Advertisement