کوردستان

دەستەی ژینگە هۆشداری دەدات لە هاوردەكردنی كۆمەڵێك ئامێر

09:08 - 16/09/2020 155 جار خوێندراوەتەوە

"زەمەن"


دەستەی پاراستن و چاككردنی ژینگە هۆشداری دەدات لە هاوردەكردنی ئامێرەكانی بەفرگرو ساردكەرەوەو سپلیت كە هێشتا غازەكانی كلۆر فلۆر كاربۆنیان تێدا بەكار دەهێنرێن.

لە رۆژی جیهانیی ئۆزۆن دا دەستەی پاراستن و چاككردنی ژینگەی حكومەتی هەرێم راگەیەنراوێكی بڵاوكردەوەو رایگەیاند، " بەردەوامین لە هەڵمەتی هۆشیاركردنەوەی بازاڕو شوێنە بازرگانییەكان و هاوردەكارانی غازی ئامێرەكانی ساردكردنەوەشدا ، بەمەبەستی ناساندنی غازەكانی كلۆرو فلۆرو كاربۆن كە زیان بەژینگەو چینی ئۆزۆن دەگەیەنن".

دەستەی پاراستن و چاكردنی ژینگە داوادەكات، "لایەنە پەوەندی داراەكن ڕێگە نەدەن بەهاوردەكردنی ئەو جۆرە لە ئامێرەكانی بەفرگرو ساردكەرەوەو سپلیت كە هێشتا غازەكانی كلۆرو فلۆرو كاربۆنیان تێدا بەكار دەهێنرێن ، چونكە هەرێمی كوردستانیش وەك ئەو دوای عێڕاق پابەندكراوە بە رێككەوتنامەی ڤییەناو مۆنتریال بۆ پارێزگارییكردن لە ئۆزۆن ، بۆیە پێویستە ئێمەش بەردەوام بین لەسەر رێكارەكانی كەمكردنەوەی پلە بە پلەی ئەو غازانەی كە كاریگەرییان لەسەر چینی ئۆزۆن هەیە".

 

دەقی راگەیەنراوەکە

رۆژی 16 ی ئەیلولی هەموو ساڵێك بە ڕۆژی جیهانیی ئۆزۆن دیار كراوە لەلایەن نەتەوە یەكگرتووەكانەوە ، بەمەبەستی پاراستنی چینی ئۆزۆن كە زەوی و مرۆڤ لە تیشكی زیانبەخشی سەروو بنەوشەیی دەپارێزێت.
ئێمەش لەهەرێمی كوردستاندا هەمان ئەو ئەرك و بەرپرسیارێتییەمان دەكەوێتە ئەستۆ ، كە ساڵانێكە لەئەستۆی دەوڵەتی عێڕاقیشدایە ، بەتایبەت دوای ئەوەی عێڕاق لەساڵی 2008 وە چووە نێو رێككەوتنامەی ڤییەناو مۆنتریال بۆ پارێزگارییكردن لەئۆزۆن ، بەمەش عێڕاق دەبێت پابەند بێت بە كەمكردنەوەی بەكارهێنان و قەدەغەی هاوردەكردنی تەواوی ئەو غازو ماددانەی كە زیان بە ئۆزۆن دەگەیەنن.
ئەنجومەنی نیشتمانیی ئۆزۆن لەوەزارەتی تەندروستیی و ژینگەی عێڕاق بەردەوامە لە هەماهەنگیی لەگەڵ دەستەی ژبنگەی هەرێمی كوردستان و ، بەهاوكاریی پڕۆگرامی نەتەوە یەكگرتووەكان بۆ ژینگە لە رێكخستنی خولی راهێنان و هۆشیاریی بۆ كارمەندانی فەرمانگەكانی گومرك و پێوانەسازیی و كۆنتڕۆڵی جۆریی و بازرگانیی و پیشەسازیی و دەروازە سنوورییەكان ، لەچوارچێوەی پڕۆژەی رزگاربوون و قەدەغەكردنی بازرگانیی نایاسایی بەو ماددانەی كە زیان بەچینی ئۆزۆن دەگەیەنن ،  ئەمەش بە پشتبەستن بەرێنماییە یاساییە بەركارەكان.
بۆ ئەم مەبەستەش چەندین ۆركشۆپ و سیمیناری كرداریی هاوبەش ئەنجام دراون بۆ فێركردنی چۆنیەتی بەكارهێنانی ئامێرەكانی دۆزینەوەو شیكردنەوەی غازە بەكارهاتووەكانی نێو ئامێرەكانی ساردكەرەوەو فێنككەرەوەكان ، هەروەها نمایشكردنی زۆر فیلمی دیكیۆمێنتاریی و ، راهێنان كردن بەخاوەنی بەشێك لەشوێنەكانی چاككردنەوەی ئامێرەكانی ساردكرنەوەو فێنككردنەوە ، هەروەها بە پێدانی كەرەستەو ئامێری نوێ و پێشكەوتوو بۆ پڕۆسەی پڕكردنەوەو گێڕانەوەی غازەكان.
دەستەی پاراستن چاككردنی ژینگەی هەرێمی كوردستانیش بەردەوامە لە هەڵمەتی هۆشیاركردنەوەی بازاڕو شوێنە بازرگانییەكان و هاوردەكارانی غازی ئامێرەكانی ساردكردنەوەشدا ، بەمەبەستی ناساندنی غازەكانی كلۆر فلۆر كاربۆن كە زیان بەژینگەو چینی ئۆزۆن دەگەیەنن.
هەروەها لەم رۆژەشدا داواكارین لەوەزارەتی بازرگانیی و پیشەسازیی و بەڕێوەبەرایەتیی گشتی گومرگ كە ڕێگە نەدەن بەهاوردەكردنی ئەو جۆرە لە ئامێرەكانی بەفرگرو ساردكەرەوەو سپلیت كە هێشتا غازەكانی كلۆر فلۆر كاربۆنیان تێدا بەكار دەهێنرێن ، چونكە هەرێمی كوردستانیش وەك ئەو دوای عێڕاق پابەندكراوە بە رێككەوتنامەی ڤییەناو مۆنتریال بۆ پارێزگارییكردن لە ئۆزۆن ، بۆیە پێویستە ئێمەش بەردەوام بین لەسەر رێكارەكانی كەمكردنەوەی پلە بە پلەی ئەو غازانەی كە كاریگەرییان لەسەر چینی ئۆزۆن هەیه.
دەستەی پاراستن و چاككردنی ژینگە
16/9/2020

سۆشیال میدیا

ڕۆژنامەی زەمەن

Advertisement