وتار

مامۆستا له‌ پۆسته‌ری ریکلامەکاندا شیكپۆشە!

8/7/2019 10:04:00 PM 155 جار خوێندراوەتەوە
سامان ساڵح

 

ئه‌م وتاره‌ تیشك ده‌خاته‌سه‌ر بابه‌تێكی به‌رچاو كه‌ سه‌رنجدان و ره‌خنه‌گرتنه‌ له‌و مامۆستایانه‌ی كه‌ له‌ دوای ئه‌ركی قوتابخانه‌، وانه‌ی تایبه‌ت ده‌ڵێنه‌وه‌ و ئێستا له‌ زۆربه‌ی سه‌ركۆڵان و گه‌ڕه‌ك و شه‌قامه‌كان، وێنه‌و پۆسته‌ری بانگه‌شه‌یان بۆخۆیان هه‌ڵواسیوه‌. لەو پۆستەرانەدا ‌جلوبه‌رگێكی شیك و رێكپۆشیان لەبەرکردووە بۆ راكێشانی سه‌رنجی خوێندكار و كه‌سوكاریان.‌
جلوبه‌رگی ئه‌و مامۆستایانه‌ی لە پۆستەرەکاندا هەن به‌راوردی بکە بەو جلوبەرگەی لە ده‌وامی قوتابخانه‌ دەیپۆشن، جیاوازییه‌كی زۆریان هه‌یه‌! ره‌وایه‌تی ره‌خنه‌كه‌ له‌ ڕوانگه‌ی قانوون و رێسای ئاكاری پیشه‌ییه‌‌‌، كه‌ بنه‌مای رێكخستنی ره‌فتاری پیشه‌ییانه‌ی فه‌رمانبه‌ره‌ له‌ناو كه‌رتی گشتیی و تایبه‌تدا.
ئاكاری پیشه‌یی work ethic
مه‌به‌ست له‌ ئاكاری پیشه‌یی بریتییه‌ له‌  زنجیره‌یه‌ك پره‌نسیپی ئه‌خلاقیی كه‌ كه‌سی خاوه‌ن پیشه‌ له‌ پیشه‌كه‌یدا به‌كاریده‌هێنێ به‌رامبه‌ر به‌ سوودمه‌نده‌كانی پیشه‌كه‌ی. له‌پێناو به‌دیهێنانی ئامانجه‌كانی ده‌زگا‌و دامه‌زراوه‌كه‌دا كه‌ به‌سه‌رچاوه‌ی رێزی خودی كه‌سه‌كه‌ له‌ پیشه‌كه‌ی خۆی و رازیبوونی سوودمه‌ندان داده‌نرێت. 
بۆ نموونه‌ پاراستنی نهێنی نه‌خۆش له‌لایه‌ن پزیشكه‌وه‌، پاراستنی كه‌سێتی خوێندكار له‌لایه‌ن مامۆستاوه‌، ناپاكی نه‌كردن له‌ پرسیاری تاقیكردنه‌وه‌و.. تاد.
مامۆستاكانی وانه‌ی تایبه‌ت كه‌شخه‌ن؟
 كاتێك له‌سه‌ر كۆڵان و گه‌ڕه‌ك و شه‌قامه‌كان و  به‌ ‌ستوونی كاره‌باوه،‌ وێنه‌ی ئه‌و مامۆستایانه‌ ده‌بینم كه‌ بانگه‌شه‌ بۆ وتنه‌وه‌ی وانه‌ تایبه‌ت ده‌كه‌ن، پرسیاری ئه‌وه‌م له‌لا دروست ده‌بێ، ئه‌م هه‌موو مامۆستا شیكپۆشه‌ له‌ كوێن من له‌كاتی ده‌وامی فه‌رمیی نایانبینم به‌ چاكه‌ت و پانتۆڵ و بۆینباخ و  پاكوخاوێنه‌وه‌؟
ئه‌گه‌ر پرسیاره‌كه‌ لەو مامۆستایانە ‌خۆیان بكه‌ی ناتوانێت وه‌ڵامێكی ڕاست و وردت بداته‌وه‌، من بۆ زانیاری زیاتر پرسیارم له‌چه‌ند كه‌سێك كردووه‌، پوخته‌ی وه‌ڵام ئه‌وه‌یه‌كه‌“پیاو ئه‌گه‌ر بیه‌وێ پاره‌ په‌یدابكات، ده‌بێ خۆی شیك ده‌ربخات و پۆخڵه‌وات نه‌بێ”
 ئه‌م وه‌ڵامه بۆ من و هه‌موو ئه‌وانه‌ی كه‌ ویژدانیان هه‌یه‌،‌ هێنده‌ی دیارده‌كه‌ زیاتر ئازاربه‌خشه‌. كاتێك مامۆستایه‌ك به‌ پانتۆڵی كاوبۆ و تیشێرت و تۆپه‌ڵێك كلیلی لای سمتی و نه‌عل یان شه‌حاته‌، یان پێڵاوێكی بۆیاخ نه‌كراو له‌ده‌وامی فه‌رمییدا ده‌بینی، كه‌ زۆرجار قژیشیان دانه‌هێناوه‌، کەچی هه‌مان مامۆستا به‌ پۆسته‌رێكه‌وه‌ ده‌بینی كه‌ شیكپۆش و جلی فه‌ڕمیی له ‌به‌ردایه، به‌ دڵنیاییه‌وه‌ غیابی ئاكاری پیشه‌یی ئه‌و مامۆستایه‌ت بۆ ده‌رده‌كه‌وێ. چونكه‌ ناكرێت كه‌سێكی خاوه‌ن ئه‌ركێكی گشتیی و به‌رپرس كه‌ موچه‌ له‌پێناو كارێك وه‌رده‌گرێ له‌به‌رامبه‌ردا راسپارده‌كه‌ی به‌ ده‌ستپاكییه‌وه‌ نه‌گه‌یه‌نێ. 
خۆ ئه‌گه‌ر ده‌ڵێن “موچه‌ نه‌ له‌كاتی خۆی دێت‌و نه‌ حكومه‌ت راستگۆیه‌ ئه‌وه‌ منیش هه‌مان قسه‌م هه‌یه‌، به‌ڵام به‌شی دووه‌می ئه‌م قسه‌یه‌ش ده‌بێـ ته‌واو بكه‌ین، ئه‌ویش ئه‌وه‌یه‌ كه؛‌ ئه‌خلاقی مامۆستا و هه‌ر فه‌رمانبه‌رێكی دیكه‌، نابێ له‌گه‌ڵ موچه‌دا بگۆڕێ. چونكه‌ ئه‌خلاق پێویسته‌ جێگیربێت نه‌ك گۆڕاو، بۆیه‌ زۆر جێگه‌ی شه‌رمه‌ مامۆستایه‌ك‌ یان هه‌ر فه‌رمانبه‌رێك ئه‌ركی ئه‌خلاقی پیشه‌یی خۆی به‌ شێوازێكی راسته‌قینه‌ جێبه‌جێنه‌كات، له‌ قوتابخانه‌ په‌ڕپوت و بۆ وانه‌ی تایبه‌تیش رێكپۆش و بۆینباخ له‌مل!.
له‌م رۆژانه‌ی پێشوودا له‌گه‌ڵ مامۆستایه‌كی به‌ڕێزی خاوه‌ن ئه‌زموون له‌سه‌ر ئه‌م پرسه‌ قسه‌مان ده‌كرد، نموونه‌یه‌كی بۆ هێنامه‌وه‌ كه هی‌ ساڵانی زووه‌‌، مامۆستایه‌ك لەناوبازاڕ دوكانێكی دانابوو، به‌رێوه‌به‌ری په‌روه‌رده‌ بانگی كردووه‌و پێی وتووه‌: ده‌بێ له‌نێوان مامۆستایه‌تی و دوكاندارییدا یه‌كێكیان هه‌ڵبژێری. 
 ئێستا ژیان قورسه‌ و دنیا گۆڕاوه‌، منیش ده‌زانم‌و وه‌ك ده‌ڵێن: له‌ گوێی گادا نه‌نووستوم، به‌ڵام ئه‌و خوێندكارانه‌شی پاره‌ ده‌ده‌ن به‌ مامۆستاكان، له‌گوێی گادا نه‌نووستون، كاتێك مامۆستاكه له‌نزیكه‌وه‌ “به‌ گۆشتی”‌ ده‌بینن له‌ مامۆستای ناو وێنه‌ی سه‌ر پۆسته‌ره‌كه‌ ناچێ، ئیتر متمانه‌ی مامۆستا له‌ناو ده‌چێ. هه‌ربۆیه‌ به‌شێك له‌ مامۆستای ئه‌مڕۆش رۆڵ و پێگه‌ی لاوازبووه‌، چونكه‌ به‌ گوێره‌ی رۆژگار وێنه‌كه‌ی ده‌گۆڕێت‌و بنه‌مای جێگیری نییه‌.

سۆشیال میدیا

ڕۆژنامەی زەمەن